Kan sorkar veleh HPC budget kan tisang - Chief Minister

Chief minister Lalduhoma, Lunglei High Powered Committee (HPC) chairman ni bawk chuan nimin khan C Ṭhuamluaia Mual, Lungleiah Lunglei District Football Association buatsaih 15th HPC Cup 2026 hmawrbâwkna a hmanpui a; ZPM-in sorkarna an chan veleh HPC budget kum khata cheng vbc 5 ni ṭhin chu vbc 7-ah an tihpun nghal thu a sawi.

Lalduhoma chuan, ZPM kaihhruai sorkarin HPC fund (District Annual Plan) cheng vbc 5 ni ṭhin chu vbc 7-ah an tihpun bakah, HPC Cup budget pawh Rs 6,00,000 aṭangin Rs 8,00,000-ah an tihsan thu a sawi a; Lunglei district tana sorkarin hmasawnna tur a ruahmante a sawi lang.

Lunglei chu mi ropui tak tak chhuahna hmun a nih thu sawiin CM chuan, "Lunglei hi tun hma aṭanga thluak tamna hmun tih ṭhin, ram hruaitu ropui tak tak te, thu leh hlaa mi langsar tak tak te, thiamna lama mi chhuanawm tak tak te, infiamnaa mi hlawhtling tak tak leh zaithiam tam tak hring chhuaktu a ni," a ti a; kum 1983-a din LDFA hmalakna ṭha tak avangin hmán aṭanga tun thlengin inkhel thiam an ngah thu a sawi.

Chief Minister chuan, Mizoram State University chu Lungleia dah tura ruahman a ni tawh thu sawiin, "A ṭul anga bawhzui mek a ni," a ti a; kar hmasa khan SASCI 2026–27 Part-I aṭanga hna thawh turte thlan a ni a, chutah chuan Lunglei district tan hmasawnna hna hrang hrang thawhna tur cheng nuai 2,449 a tel tih a sawi bawk.

15th HPC Cup hmâwr-bâwknaah hian MLA pali - Lunglei HPC vice chairman V Malsawmtluanga, adviser to CM Dr Lorrain Lalpekliana Chinzah, Lunglei South bialtu Lalramliana Papuia leh South Tuipui bialtu Jeje Lalpekhlua te an tel a; Lunglei Municipal Council chairman Lalzuithanga leh councillor-te an tel bawk.

HPC Cup-ah hian mipa (men's team) leh mipa naupang (kum 16 hnuai lam) inelna buatsaih a ni a, May 16, 2026 khan ṭan a ni. Men's champion team-in Rs 1,20,000 an dawng a, U-16 champion team-in Rs 10,000 an dawng.