Sazu puang vangin 2025 chhungin Mizoramin cheng vbc 634.35 a hloh

Sazu puang vanga kum 2025 chhunga Mizoramin sum a hloh zat chu cheng vbc 634.35-a chhût a ni a, a siamṭhat lehna (recovery & reconstruction) atan cheng vbc 879.82 vel a ṭula chhût a ni bawk.

Chief minister Lalduhoma hoa June 25, Ningania State Disaster Management Authority (SDMA) ṭhukhawm chuan Post Disaster Needs Assesment Report for 2021-25 an thlir a; kum 2021-2025 chhunga khuarel chhiatna vanga Mizorama chhiatna thleng lian zual tarlante chu - Cyclone Remal, African Swine Fever, ruahsur nasa leh leimin nasa bakah, hmun ṭhenkhata sazu puang te a ni.

Tarlan danin, kum 2025-a Mizoram hmun ṭhenkhata sazu puang vanga Mizoramin a hloh zat chu cheng vbc 656.76 leh, economic loss cheng vbc 634.35 hûa chhût a ni a; chhiatna thleng siamṭhat leh vekna (overall recovery & reconstruction) atan cheng vbc 879.82 a ṭul tura chhût a ni.

Meeting-ah hian Mizoram State Disaster Management Plan, 2026 leh district 11-te Disaster Management Plan-te sawifiah a ni a; Project Management Unit for National Landslide Risk Mitigation Project, National Earthquake Risk Mitigation Project leh Mitigation Scheme for Forest Fire Risk Management te Mizoram sorkarin a din tawh thu tarlan niin, PMU chu a taka hna thawk thei tura thuam chak dan tur sawiho a ni.

Emergency Response Support System kalpui zel dan tur te, kum 2024-25 chhunga district hrang hranga recovery & reconstruction fund cheng vbc 11.44 senna tura hna thawh tur thlan chhuah 178 te, search & rescue hmanraw lei belhna turte leh ASF State Specific Disaster-a puan zui zel chungchangte an ngaihtuah bawk.

Ṭhutkhawmah hian Home minister K Sapdanga, PWD minister Vanlalhlana, Health minister Lalrinpuii, Power & Electricity minister F Rodingliana, Supply minister B Lalchhanzova leh DMR minister Prof. Lalnilawma leh, National Disaster Management Authority member Rita Massal leh official dangte an tel.