Hmun panga-ah heroin man a ni

Tun hnai khan Mizoram Police, Excise & Narcotics department (END) leh Assam Rifles ten Mizoram hmun hrang hrangah ruihhlo an man.

END leh Assam Rifles te chuan nimin khan Siahaaa in pakhatah heroin gram 9.08 an man a; a neitua puh mi pahnih an man nghal bakah, mobile phone pahnih an hrênsak.

Bawngkawn police-te chuan June 25, Ningani tlai khan Seling Zero Point-ah auto rickshaw-a chuang hmeichhe pathum hnen aṭangin heroin an man. Police-te hian Tingboichong Hoakip (27), Salemphai, Manipur hnen aṭangin gram 13, Nemreikim (37), K Mongjang, Manipur hnen aṭangin gram 185.66 leh, Nemneihling, Salemphai, Manipur hnen aṭangin gram 200.98 man a; a hnuah Manipur aṭanga an rawn kalna Bolero khalhtu Thangchungha, Bolgol, Manipur an man leh bawk.

June 24, 2026 khan Assam Rifles leh Excise & Narcotics department mite'n Tuikual North-a in pakhatah heroin gram 63 an man a; a neitua puh Myanmar lam mi mipa pakhat leh hmeichhia pathum an man nghal.

Champhai police-te leh Assam Rifles-te'n Champhai Zote huam chhungah scooter MZ-06 5426 aṭangin heroin gram 87.2 an man a; Zote-ah vek hian June 24 khan Yamaha R15 bike MZ-01 N-4825-ah mi pakhat hnen aṭangin heroin gram 24.8 an man bawk. Scooter leh bike khalhtute an man nghal a ni.