MUCO Bank-in inkhawmpui hmang

Mizoram Urban Cooperative (MUCO) Bank Ltd. chuan June 25, Ningani khan Aijal Club-ah inkhawmpui vawi 32-na an hmang a, Cooperation minister PC Vanlalruata'n a hmanpui.

Sorkar thuchhuah tarlan danin, MUCO Bank hi August 11, 1988-ah din a ni a, shareholder mi 5,664 an awm. Deposit cheng nuai 8,150.75 dawng tawhin, loan cheng nuai 3,948.77 an pek tawh a, loan chhia (NPA) nuai 218.95 an nei mek.

Inkhawm hi MUCO Bank chairman R Lian-tluanga'n a kaihruai a; minister PC Vanlalruata chuan, sorkarin kut hnathawktute a ngai pawimawh thu sawiin, "Sawhthing leina atan sorkarin cheng nuai tam tak thingtlang lamah a pek chhuak a, kut hnathawktute'n an sum dahṭhatna tur bank an mamawh zel a, chung atan chuan MUCO Bank hian chanvo pawimawh tak an chelh a ni," a ti a; Mizoramin hma a sawn zelna tura bank mawhphurhnate hre chiang turin a chah.