Lawngtlaia Trauma Care Facility hawng

Adviser to CM Dr Lorrain Lalpekliana Chinzah, MLA chuan June 25, Ningani khan Lawngtlai District Hospital-a Trauma Care Facility a hawng a; a MLA fund hmangin nurse leh group-D pakhat ve ve a chhawr dawn thu a sawi.

Dr Lorrain Lalpekliana Chinzah chuan, Trauma Care Facility hawn a nih avangin Lawngtlai district-in hriselna kawngah rahbi thar a kai thu a sawi a, "Damlo te, doctor-te leh thawktute'n an hmang ṭangkai dawn hle a, damlo enkawl kawngah nasa takin hmasawnna a thlen dawn a ni," a ti.

Lawngtlai District Hospital-a thawktu indaih lohna a hriatpui thu sawiin Dr Lorrain Lalpekliana chuan, "Chak taka hmalak mek zel a ni. Mamawh tam tak zingah MLA fund aṭangin nurse pakhat leh group D pakhat chhawr a ni dawn. Hmasawnna turin tih tur tam tak a awm a, vawi khatah tih vek theih ni lo mah se, a tahtawla hmalak zel a tul," a ti a; ṭhahnemngai taka thawk zel tur leh, pantute hmangaih tak lo enkawl ṭhin turin District Hospital-a thawkte a chah.

Trauma Care Facility hawnna inkhawm hi medical superin-tendent Dr Paul Lalchungnunga'n a kaihruai a; Lawngtlai bawrhsap Donny Lalruatsanga pawhin thu a sawi a ni.