Nasha Mukt Saptah khâr a ni

Nasha Mukt Bharat Abhiyaan (NMBA) hnuaia India ram pum huapa ruihhlo do beihpui thlakna, Nasha Mukt Saptah (June 17 - 26) pual leh Ruihhlo Dona ni pualin nimin zing khan Kolasib-ah walkathon buatsaih a ni a; Champhaiah June 25, Ningani khan Nasha Mukt Saptah kharna leh Ruihhlo Dona Ni hman a ni.

Kolasib-a Nasha Mukt Saptah Walkathon hi hman hnihah ṭan a ni a; bawrhsap H Dolianbuaia team-te Khuangpuilam lamah an kal a, additional DC B Malsawm-tluangi team-te chu Regional Sports Training Centre, Saidan lamah an kal. Kalkhawmte chuan ruihhlo do turin thu an tiam a, ruihhlo do chungchang auhlate an sawi rual bawk.

Champhaiah chuan June 25 khan Circuit House tualah Nasha Mukt Saptah kharna leh Ruihhlo Dona Ni hman a ni a, bawrhsap Mohammad Aaquib-a'n a hmanpui. Khârna pual hian Champhai Buffalo chuan New Champhai aṭanga Circuit House thleng Bike Rally an nei a ni.

Inkhawmah hian pawl hrang hrang aiawhte an tel a, Bawrhsap bakah, SP Lokeshwaran R leh pawl aiawhte'n thu an sawi. Ruihhlo leh a kaihhnawih laka fihlim tura intiamna thu sawi rual a ni a, tleirawl lai aṭanga ruihhlo ti ṭan, sim tawhte aṭangin testimony ngaihthlak a ni bawk.