MLA-in Salt Lake Mizoram House enfiah

KMTTPP leh Railway Line-in Mizorama nghawng a neih dan tur zir chiang tura West Bengal tlawh kualtu T Lalhlimpuia, MLA, PWD Minister puitu ni bawk chuan nimin khan Kolkata-a Salt Lake Mizoram House building thawm ṭhat tura hmalak mek a enfiah.

MLA hian Mizoram House building khî te, a chung lam aṭanga ruahtui far ṭhinna te, building páwn lama bang thlawk chhuak (fins) khi te, hmar lam leh chhim lama bang, chung lam hawia khi chat te, chhâwng tina a chhe lai siamṭhat ngai zualte a en a ni.

Mizoram House kawt zawla tui luankawr chhia vanga lei tlahniam te, electric wiring siam ṭhat ngai te, transformer te, ram hungna pal (fencing) siam ṭhat ngai lai te, bual-in leh inthiarna siam ṭhat ngai te, tukverh frame thlak ngai laite a en bawk.

T Lalhlimpuia chuan, Mizoram House building chhe zual lai thawmna atan cheng nuai 300 chuang ruahman mek a nih thu a sawi. Thawm ṭhat hna ṭan thuai a nih tur thu te, sum ruahmanin siam ngai laite a daih vek dawn loh avangin PWD engineer-te'n thawh hmasak tur uluk taka an en a ṭul tur thu leh a chhe zual laiah bul ṭan phawt a nih tur thute a sawi bawk a ni.

MLA T Lalhlimpuia hi Kolkata Mizoram House joint resident commis-sioner Zoremthara Ralte leh a thawhpui te, contractor tur Jatan Builders hotute'n an ṭawiawm.