Citizenship Ammendment Bill dodal nan Naktukah Mizoramah total bandh
India hmarchhak biala zirlai pawl inzawmkhawm, North East Students’ Organisation (NESO) chuan The Citizenship (Amendment) Bill, 2016 duh lohna leh an dodalzia lantir nan naktuk hian hmarchhak state pumah total bandh huaihawt a ni dawn a, Mizoramah pawh MZP bultumin total bandh neih ani dawn. Chief minister Zoramthanga pawhin The Citizenship (Amendment) Bill chu an party-in an duh loh thu a lo sawi tawh a ni.
MZP chuan nimin khan an pisaah emergency meeting neiin, total bandh an nei tur chungchang an ngaihtuah a; bandh chu zing dar 5 aṭanga tlai dar 4 thleng neih turin an rel a ni.
MZP-in ruahmanna an siam dan chuan, Kulikawn, Sikulpuikawn, Treasury Squre, Khatla kâwn, Tennis Court, Temple Squre, Vaivakawn, Hunthar Veng Company Pêng, Bawngkawn, Zemabawk, Chaltlang Dawrkawn, Ramhlun Industry Pêng, Chanmari kâwn, Zarkawt kâwn, Bazar Bungkawn leh College Vengahte duty indah an tum a ni.
Total bandh hian chanchinbumi, chanchinbu sem, venhimna hnathawktute (police), PHE tui sem, damdawi-ina thawk, bawnghnute semleh Power & Electricty department-a emergency-a hnathawkte a huam lo ang.
MZP chuan, The Citizenship (Amendment) Bill, 2016 chu India hmarchhak mite'n an duh lo tlang hle tih tarlangin, "Bill hian India khua leh tui zawng zawng a nghawng avangin, pawm a nih chuan Afghanistan, Bangladesh leh Pakistan aṭanga India rama rawn lut - Hindu, Sikh, Buddhist, Jain, Persi-te chu India ramah kum ruk chhung an awm tawh chuan India khua leh tui nihna pek tur an ni. Bill-in a tum ber chu - Hindu, Sikh, Buddhist, Jain, Persi mi leh sate Afghanistan, Bangladesh leh Pakistan chhuakte tan India khua leh tui a nih theih dawn a , sakhaw behchhana citizen nih theihna tur bill a ni," an ti.
Bill hi Parliament-ah pass a nih chuan Mizoram tan a hlauhawm zual hle nia tarlangin MZP chuan, "Bangladesh aṭanga dan loa lo lut Chakma foreigner-te hian awlsam takin India khua leh tui nihna an nei thei dawn. Mizoramah pawh NGO Coordination Committee kaihhruaina hnuaiah all political party leh joint NGO pawhin duh lohna lantir a ni tawh a, memorandum inang tlang thehluh a ni," an ti a; Bill zir chiangtu Joint Parliamentary Committee on Citizenship (Amendment) Bill, 2016 chuan Mizoram an la tlawh ve loh thu a sawi.
Hetih lai hian, chief minister Zoramthanga chuan chief minister a nih hma, August 11, 2017 khan Mizo Hnam Rûna thu a sawinaah Citizenship (Ammendment) Bill an duh loh thu a lo sawi tawh tih sawiin, "Bill pass a nih chuan Chakma foreigner, dan bawhchhiaa Mizoram rawn lut leh inbéngbel zawng zawng deuh thaw hi Mizorama dan ang thlapa India khua leh tui nihna pek an ni dawn a, a nghawng chu a pawi hle dawn a ni. He Bill do tur hian India hmarchhak mi zawng zawng kan sáwm a, Mizoram sorkar leh party zawng zawng kan sáwm bawk a ni," a ti.
Central YMA-in political party leh tlawmngai pawl zawng zawngte leh sorkarte chu hma la turin sáwm se a duh thu sawiin Zoramthanga chuan, "Signature pe ṭheuh ila kan duh a ni," a ti a; Committee on Citizenship (Amendment) Bill, 2016 chu a tàwp thlenga an dodal tur thu a sawi.