Bazara ṭhute awm lailâwkna tur peih tawh

Aizawl District Disaster Ma­nagement Authority (ADDMA­) zirchianna zûlzuia Aizawl New Market main building sak ṭhat a nih dawn avangin, dawr neitute sawn chhuah lailâwkna tur peih a ni tawh a, sawn chhuah hun tur erawh tihchian a la ni lo.

Commerce & Industries director J Hmingthanmawia chuan, New Market main building-a ṭhute chu an vaia sawn chhuah a ngaih dawn avangin sak ṭhat a nih laia an awm lailawkna tur hmun ruahman a nih thu a sawi a, "Mi chaw thlèng zen buak theihna a nih avangin sorkarin uluk takin ruhmanna a siam a, an ṭhutna tur hmun kan tihfel hnuah kan sawn chhuak ang a, kan sak zawh veleh kan sawn lut leh vek ang," a ti.

New Market main building-a dawr neitute hi Directorate of Industries, Khatla bula bazar building tur hmun hniha sak tharah te, Bawngkawn Bazarah leh Bawngkawna AMC building sak thar floor pathumahte sem darha dah tum a ni.

J Hmingthanmawia chuan, Foreign Lane sak ṭhat nan Rs. 36,41,59,000 an neih tawh thu leh Smart City project hnuaiah cheng vbc. 34 hmangin New Market main building sak ṭhat tum a nih thu a sawi.

Sawn chhuah turte chuan New Market building sak ṭhat zawha luah theih a nih huna seat an chan theih nan sorkar nen agreement ziah an phût tih sawiin Hmingthanmawia chuan, "Department-in seat kan pek thi tawh tam tak an awm avangin agreement sign tur chuan tuna seat enkawltute hnenah heirship certificate kan phût a, hming dik loa ziak an awm nual avangin voter ID-a hming ziah dan nena inmil ziak vek turin kan ti bawk," a ti.

Commerce & Industries Director sawi danin, hming ziah ṭhat tawh 800 chuang an awm a, ziah ṭhat ngai eng emaw zat an la awm. Hming ziah ṭhat zawhah agreement ziahpui theih chauh a ni ang.

ADDMA-in building him tâwk loa an ngaih avangin January 30, 2017 khan New Market main building chu sak ṭhat emaw, major repair emaw turin rawtna a siam. June 2019 vela sorkar hotute'n sak ṭhat tuma hma an lak mek laiin Mizoram Merchant Association leh New Market Building Dawrkai Association chuan July 30, 2019 khan Commerce & Industries minister Dr R Lalthangliana leh chief secretary Lalnunmawia Chuaungo te an hmu ve ve a, New Market building chu 2019 Krismas hma chuan ṭhiat lo tur leh, 2019 Krismas zawhah chuan an dahna hmun apiangah awmin building thar an nghah tur thu an lo thlen tawh a ni.