Mizote inpumkhatna tura hmalak hi MNF sorkar tih tur a ni - Dr Thangtea

Minister Dr R Lal­thangliana chuan January 5, Inrinni khan Tripura Jampui tlangdunga Vang­hmun khuain an khaw kum 100 tlin, centenary an lawmna a hmanpui. Minister chuan, Mizote inpumkhatna tura hmalak chu MNF kaihhruai sorkar tih tur pawimawh tak zinga mi a nih thu a sawi a; centenary lawmpui nan Rs. 30,000 a hlân.

Dr R Lalthangliana chuan, Mizote chu geo­graphical boundary-in hmun hrang hrangah ṭhen darh mah se, thinlung erawh a ṭhen hrang thei lo tih sawiin, "Zo fate inpumkhatna tura hmalak hi vawiina MNF sorkar ding thar mek tih tur pawimawh tak zingah kan telh. Zo fate luah chin ram rorelna pakhat hnuaia a awm theih nan hmalak kan tum a, Zo hnahthlak inpumkhat nan sorkar angin nasa taka hmalak kan tum a ni," a ti.

Health Minister chuan, "Zo fate ram hrang hrangah ṭhen darhin kan awm a, heng mite dinhmun hi kan ngaihtuahnaah a awm reng a ni," a ti a; MNF sorkar hmasain Mizoram páwna Mizote chungchangah an tih tur an tih tâwk loh a awm tih an hriat thu sawiin, MNF sorkar leh party aiawhin ngaihdam a dil tih a sawi.

Tuipuibari lam aṭanga Zampui tlang panna kawng kal theih loa a awm chu pawi a tih thu sawiin Dr R Lalthangliana chuan, "Kawng hi ṭha taka a tlang leh theih nan Mizoram sorkar chuan hma a lak ngei ka ring. Tuidam 

aṭanga Rulchukkawn kawng, MNF sorkar hma­sain ṭha taka a laih tlangah pawh Tripura sorkarin a tih tur a ti tâwk lo deuh niin a lang a, he kawng, Aizawl hnai taka kal theihna tur hi ṭha taka a tlang theih nan Tripura sorkar pawh hma la turin ngen ka tum a ni," a ti.

Vanghmun khua hi Sailo lal ropui Suakpuilala fapa Dokhuma Sailo-in kum 1919-a a din a ni a, tunah hian in 300 vel awmin, mi 1,000 chuang an chêng mek. Centenary lawmna hi January 3 khan Behliangchhip aṭanga centenary meichher lain hman ṭan a ni a, nimin khan centenary lawmna khâr a ni.