Mipuite beisei kan phâk lo a nih chuan an ngaihdamna kan ngen - ZPM Leader

Zoram Peoples' Movement (ZPM) leader K Sapdanga chuan, ZPM-in mipui beisei an phâk lo a nih chuan ngaidam turin Mizoram mipui a ngen.

K Sapdanga hi Inrinni khan Aizawl Press Club-ah thuthar thehdarhtute nen an inkâwm a; ZPM chu bial pariatah mipui aiawh tura thlan tlin an nih thu sawiin, "Eptu party lian ber a ni hi hlawhtlin bul ṭanaah kan pawm a, kan lawm tak zet. Mipuite beisei zat kan la pha lo a nih pawhin, mipui thiam loh ni loin, inbuatsaih hun tawi vang leh thawktute indaih loh vang a ni tih min pawmsak a, min ngaihdam turin Mizoram mipuite kan ngen a ni," a ti.

Kristian sakhaw himna atan ṭhahnemngai taka thawktu kohhran hrang hranga rawngbawltu te, hnam himna atana thawktu tlawmngai pawl hrang hrangte'n politics dik tak an auchhuahpui avangin ZPM chuan lawmawm an ti a, an ngaihlu tak zet tih sawiin ZPM Leader chuan, "Heng ṭhahnemngaihnate hi a takah a la chan ngei kan beisei," a ti a; Mizoram politics-ah rualawhna lang chhuak chuan politics a tih­phûrawm thar thu a sawi.

K Sapdanga chuan, inthlan zawh takah ṭhalaite'n tum neiin vote an thlak tih a hriat theih tih sawiin, "Khawpuia lehkha zir, mahni khaw lama vote thlak tura hawte kha Mizoramah kalphung thar, mipui sorkar tun din duhtute an ni. State páwna zirlaite pawh vote thlak turin sum tam tak sêngin an lo haw a, lo haw thei ngang lote pawhin phone call-in an chhungte ZPM vote turin an rawn ngen hram hram a ni. Ṭhalai rualawhna hi ZPM chuan a ngaisang a, thinlung takin lawmthu kan sawi a ni," a ti.