Zonu Meat Processing Pvt. Ltd.-in National Entrepreneurship Award a dawng

Zonu Meat Processing Pvt. Ltd. chu Ministry of Skill Development & Entrepre­neurship-in National Entrepre­neurship Award a hlan a; award hi January 4, 2019 khan Skill Development & Entre­preneurship minister Dharmen­dra Pradhan chuan New Delhi-ah Zonu Meat Processing director Dr Vanramhlimpuii, Kulikawn hnenah a hlân.

National Entrepreneurship Award hi Ministry of Skill Development & Entrepreneur­ship-in a siam niin, a hlanna inkhawm chu New Delhi-a Dr Ambedkar International Centre-ah buatsaih a ni. Mizoram aṭanga award dawngtu Zonu Meat Processing Pvt.Ltd. hian Special Category - Women-ah a dawng a ni.

Vanglaini palai zawhna chhangin Dr Vanramhlimpuii chuan, National Entrepreneurship Award hian pawisa fai Rs. 5,00,000 bakah, trophy leh certificate a keng tih a sawi.

Dr Vanramhlimpuii sawi danin, Selesih-a Vety College aṭanga Ba-chelor of Veterinary Science and Animal Husbandry (BVSc. AH) a zawh hnuah Mum­bai-ah kum 2015 khan post graduate course a zo.

Kum 2015 tawp lamah Lalrinzuala Pachuau, Mission Veng nen inthurualin, meat pro­cessing din turin ruahmanna an siam a; January 2016-ah khawl mamawh angte an la khawm ṭan a, March 2016-a product research an tih leh hnuah hna an ṭan a, June 2016 aṭangin an thil siam chhuahte chu an hralh chhuak ṭan a ni. 

Zonu Meat Processing hian tunah hian thil chi thum - sausage (bawngsa, vawksa & arsa), meat ball leh minced meat (bawng­sa) an siam chhuak mek. Anmahni pualin New Street, Mission Vengah 'Zonu Dawr' an neih bakah, a tirah chuan anmahni'n dawr hrang hrangah an sem kual a; tunah erawh chuan anmahni'n sem loin, mi dang an semtir tawh thung.

Zawhna chhangin Dr Vanramhlimpuii chuan, bul an ṭannaah sorkar aṭangin emaw, hmun dang aṭmngin emaw sum lama puihna an dawn loh thu a sawi a, "A hautak ve khawp mai. Mahse, kan thil tihah hian hma lam hun êng tak a awm a, tunah chuan mamawh ang kan la siam chhuak zo lo zawk a, tihhmasawn leh tihlen zel kan tum," a ti.

Dr Vanramhlimpuii sawi danin, bul an ṭan anga December 2018 thleng kha chuan share-holder pakhat zawk Lalrinzuala Pachuau te inah sausage, meat ball leh minced meat-te chu an siam ṭhin a, December thlaah Kulikawnah an insawn a ni.

Lian zawk leh nasa zawka hmalak an tum avangin hmunhma ṭha leh zau zawk an mamawh tih sawiin Vanramhlimpuii chuan, "Industrial Growth Centre, Luangmualah hmun min pe turin sor­karah dilna kan thehlut tawh a, kan bawhzui reng a, tun dinhmunah min la pe rih lo mah se, min pek ve ngei kan beisei a ni," a ti. 

Share-holder pakhat zawk Lalrinzuala Pachuau chuan, sa sâwngbâwl (meat processing) lam an khawih hmain Zonu Meat Processing chuan bawnghnute aṭanga thil siam chhuah lam an khawih thu a sawi a; Dr Vanramhlimpuii'n a zirlai a zawh hnuah thawk dunin, sa sawngbawl lam an khawih ta tih a sawi.

Lalrinzuala Pachuau chuan, an industry chu kum 2017-ah Mizoram University (MZU) Incu­bation Centre-in an la ve tih sawiin, "Tuna award kan dawn theih dan pawh hi MZU Incubation Centre-in min nominate vang a ni," a ti. New Eco­nomic Development Policy (NEDP) hnuaia Mizo­ram Kailawn hmanga intihsiaknaah kum 2018-ah a tling zingah an tel a, sorkar aṭangin Rs. 5,00,000 an dawng tih a sawi bawk.