SIR-ah hming lak khawm zawh a ni; Form dahkhah theih loh 46,164 a awm

Electoral Roll Special Intensive Revision (SIR) 2026 kalpui mekah nimin khan enumeration form sem, lak khawm leh ECINET-a thun luh bikte zawh a ni a; Mizoram electoral roll hman meka chuang zingah chhan hrang hrang vanga enumeration form dahkhah (fill-up) theih loh mi 46,164 an awm.

Sorkarin a tarlan danin, Mizoram electoral roll hman mekah voter 8,75,068 an awm a, mipa 4,23,397 leh hmeichhia 4,51,671 an ni. Voter 8,75,068-te hi Election Commission of India (ECI) NET-ah thun luh vek tawh (100% digitise) a ni.

Hetih lai hian, nimin dinhmun angin, e-roll hman meka chuang zingah chhan hrang hrang vanga hmuh zawh loh, enumeration form fill-up theih loh mi 46,164 an awm. Form-a ziah luh theih lohte hi voter zawng zawng zat aṭangin 4.70% a ni.

Enumeration form-a ziah luh theih lohte chu - thi tawh te, hmun danga pêm tawh, electoral roll-a awm nawn, an awmna chin hriat loh - hmuh zawh loh leh chhan dang, tihte a ni a; chhan dang zingah hian sakhuana thil (rin dan) vanga inziak lut duh lo eng emaw zat an tel.

Election hotute chuan, enumeration form dahkhah lohte pawh a ruak (blank)-in ECINET-ah thun luh vek tho a nih thu an sawi.

SIR 2026-ah hian ECINET-a enumeration form thun luh behchhanin July 4, 2026-ah draft electoral roll tlangzarh a ni dawn. July 4 aṭanga August 4, 2026 thleng siamṭhat dilna hun hawn a ni dawn a, dilna hrang hrangte September 2, 2026 thleng chinfel hna thawh a ni ang a, September 5, 2026-ah Final Electoral Roll tihchhuah a ni ang.

FORM DAHKHAH THEIH LOHTE

1. Thi tawh - 21,290

2. Pêm tawh - 13,992

3. Inziak lut tawh - 2,245

4. Hmuh zawh loh - 8,325

5. Chhan dang - 312

BELHKHAWM - 46,164