Minister-in Kolkata-a damdawi-in 2 a tlawh

Health & Family Welfare minister Lalrinpuii chuan June 27, Inrinni khan Kolkata-a MUHCS zawmtu damdawi-in zinga pahnih, Mizo damlote'n an pan nasat - Manipal Hospital - EM Bypass leh Natralaya RN Tagore Hospital te a tlawh a; damdawi-in thuneitute nen an inkawm bakah, damdawi-ina Mizo damlo awm mekte a kan.

Health Minister hian Manipal Hospital, EM Bypass tlawhin, Mizo damlo awm mekte leh damdawi-in hotute a kawm a; Manipal Hospital hotute chuan, an damdawi-in hrang hranga damlo an enkawl dan te, super speciality branch hrang hrang an neihte an lo hrilhfiah a, Mizo damlote tan theihtawp chhuah zel an tum thu an lo hrilh.

Lalrinpuii chuan, Mizorama nursing college hrang hrangah campus recruitment nei turin Manipal Hospital hotute a sáwm a; Manipal Hospital hotute pawhin an damdawi-in hrang hranga thawk turin Mizo nurse tam zawk an mamawh thu an sawi. Manipal Hospital hi cancer, lung, thluak lam leh natna dang dangah super speciality hospital a ni.

Lalrinpuii chuan Natralaya RN Tagore Hospital a tlawhnaah, damlo refer-te enkawl bakah, Tagore Hospital nen Mizoram sorkar damdawi-in tihchangtlunna tura hmachhawp hrang hrangah thawhhona tam zawk neih a duh thu a sawi a; Mizo damlo thi an awm chângin, a rang thei anga death certificate pe chhuak turin hotute a ngen.

HFW Minister hian Tagore Hospital-a a awm mek Mizo damlote a kan a, harsatna leh mamawh an neihte a zawt. Tagore Hospital hi lung (heart) leh kal (kidney) thlakah damdawi-in ṭha a ni a; Civil Hospital, Aizawla kidney transplant kalpuina tura puitu niin, Civil Hospital-a doctor leh thawktu dangte'n training thawh khatna zo tawhin, thawh hnihna neih leh tum mek a ni.

Health Minister hi Health Services director Dr Lily Chhakchhuak leh Kolkata Mizoram House joint resident commissioner Zoremthara Ralte ten an ṭawiawm a ni.