Aizawla Sewage Treatment Plant siam mek PHE Minister-in a enfiah

Public Health Engineering minister Prof. Lalnilawma chuan June 27, Inrinni zan khan AMRUT 2.0 hnuaia PHE department-in êk thlî paihna tur project a thawh mek, 'Sewerage & Septage Treatment Works for Zone-7, Aizawl City Small Bore Sewer, Tuikual Lui' a tlawh a, hna thawh mek dan a enfiah.

Sorkar thuchhuah tarlan danin, Aizawlah septic tank soak pit ṭha lo leh mumal lo a tam avangin vantlang tui luankawra luantir eng emaw zat an awm a, septic tank khah vanga paih ngai a tam hle. Hengte avang hian PHE department chuan 'Sewerage & Septage Treatment Works for Zone-7, Aizawl City Small Bore Sewer, Tuikual Lui (AMRUT 2.0) project a kalpui ni.

Ek thlî chu pipe hmangin septic tank aṭangin lak tur a ni a, MINECO mawnga Sewage Treatment Plant (STP) siamah sawngbawl tur a ni. Plant-a thlî tihfim tawh chu leiṭha leh thil dangah ṭangkai taka hman leh theih a ni ang.

Thlî paihna atan hian pipe km 31.41-a thui phûm a ni dawn a, km 8.6-a thui phûm tawh a ni. Pipe phûm hna hi zan dar 9 aṭanga a tuk zing dar 5 thleng thawh ṭhin a ni.

Project atan hian Rs 37,76,85,198 ruahman a ni a, Ace Alliance Pvt. Ltd., Guwahati-in August 5, 2024 khan an thawk ṭan a, August 5, 2026-ah zawh tura ruahman a ni. Ace Alliance hian hna an zawh aṭanga kum hnih chhung (August 5, 2028 thleng) an enkawl zui ang.

Project hian Tuikual luia thlî luan luhtir Aizawla veng 10 aṭangin ek thlî a la khawm dawn a; chu'ngte chu - Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan, Khatla, Dawrpui leh Zarkawt veng hmun ṭhenkhatte a ni.

SEWAGE TREATMENT PLANT PROJECT

☑ Veng 10-ah pipe phûm tur a ni a, tui dâwt hmangin ek-in thlî lak khawm a ni ang a, Sewage Treatment Plant-ah sawngbawl a ni dawn.

☑ Ek thlîte leia thamral emaw, luikawra paih ṭhinte tihbona hmanrua a ni dawn. Soak pit mamawhna a tibo ang a, vantlang hriselna atan leh leimin laka invenna pakhat a nih beisei a ni.

☑ STP hian ni khatah ek thlî litre nuai 35 a tithianghlim thei dawn.

☑ Septic tank khat tawh, ek paihna tur mumal a la awm loh vanga harsatna neite tan Project hnuaiah vêk ek paihna tur Faecal Sludge Treatment Plant (FSTP) pawh STP hmunah a awm nghal dawn.