Martarte Lungphunah pangpar dah

Mizoram Pradesh Youth Congress Committee (MPYCC) hruaitute chuan June 27, Inrinni khan Mizoram buai laia ram leh hnam tana nunna hlantute hriatrengna atana CTI, Sesawnga Martarte Lungphun an siam champha pualin Martarte Lungphunah pangpar an dah.

Martarte Lungphun hi Congress ṭhalaite siam a ni a, June 27, 1997 khan khatih laia Mizoram chief minister Lal Thanhawla'n a hawng. Lungphunah hian rambuai lai kum 1966-1986 chhunga thi mi 1,168 hming ziah a ni tawh a, ziah belh tur an awm chuan ziah belh zel turin an ruahman a ni.

MPYCC senior vice president Ngurdingpuia Pachuau chuan, Mizoram tana nunna hlantu martarte an ngaihhlut thu a sawi a, "Remna leh muanna a awm theih nana mahni inphat a, lalṭhutthleng kiantu Pu Lal Thanhawla leh a thawhpuite kan chhuang tak zet... Congress ṭhalaite chuan ram leh hnam rawngbawlnaa phak ang tawka theihtawp chhuah ve turin martarte hriatrengna lungphun champha pual hian kan intiam a ni," a ti.

Ngurdingpuia Pachuau chuan, Congress sorkar laiin martarte tan nasa taka hmalak a nih thu te, martar chhungte sorkar hnaah mi 70 chuang thun an nih thu te, PAMRA chhungkua 200 tan a bikin NLUP ṭanpuina pek a nih thu leh chhungkaw 40 hnenah rangva bãn 250 pek a nih thu te, hamṭhatna dang eng emaw zat pek an nih thute a sawi bawk.