Mizoramah táng 1,831 an awm mek

Mizorama jail 10-ah nimin khan táng mi 1,831 an awm a, nu tàn vanga jail-a awm ve naupang 16 nen jail-ah mi 1,847 an awm.

Mizorama jail 11 awm zinga 10-ah táng an awm a, Saitual District Jail chu siamṭhat mek a nih avangin táng an awm ve lo. Táng awm mekna mi jail 10-te chu mi 1,428 tàn theihna tura ruahman a ni.

Prison department-in Mizorama jail 11 dinhmun a tarlan danin, nimin khan jail 10-ah táng 1,831 awmin, mipa 1,623 leh hmeichhia 208 an ni a; nu-in a awmpiu naupang 16 an awm a, naupangte nen jail-ah mi 1,847 an awm mek.

Jail 10 zingah hian, jail parukah táng thei zat bituk aia tam táng 544 an awm a, táng thei tur zat bituk aia tlem tànna jail paliah mi 223 tàn theihna a la ruak a; bituk aia táng tamna leh bituk aia tlem tànna inthlauhna hi 321 a ni.

Nu tàn vanga jail-a naupang awm mek dan chu - Central Women Jail-ah pakua, Champhai District Jail-ah panga leh, Kolasib leh Serchhip district jail-ah pakhat ve ve an ni.

Nimin dinhmun angin, jail 10-a táng zingah dam chhunga táng tura hrem mi 50 an awm a; hrehawm taka táng tura hrem mi 388, tàn pangngaia táng tura hrem mi 228 leh an chungthu ngaihtuah mek mi 1,165 an awm.