SYS Minister-in khelmual siam mek a tlawh

Sports & Youth Services (SYS) minister Robert Romawia Royte chuan Inrinni khan North Eastern Council sum hmanga Muallungthu khuaa football leh hockey khelmual siam mek a tlawh a, tihhmasawn dan tur a enfiah.

Robert Romawia chuan, Ministry of Tribal Affairs, Social Welfare department leh Sport & Youth Services department ṭangkawpin Mizoramah Football Centre of Excellence leh Boxing Centre of Excellence din an tum tih a sawi a, "A bik taka entawn tlak, naupang talent nei ṭha bikte coach ṭhate'n hostel-ah an enkawl dawn a ni," a ti.

Youth Olympic-a gold medalist Jeremy Lalrinunnunga leh Youth Olympic leh Asian Games hockey-a silver medalist Lalremsiami te Mizoram sorkarin lawmpuina sum a la pe lo chu pawi a tih thu sawiin Sports Minister chuan, "Jeremy-a hnenah cheng nuai 15 leh Lalremsiami hnenah cheng nuai 20 pek thuai a ni ang," a ti a; sports policy ṭha tak an duan tur thu a sawi bawk.

SYS Minister ṭawiawmtu Lal­rinsanga Ralte, MLA chuan, Sports Minister thar hnuaiah Mizo ṭhalaite'n nasa taka hmasawnna thar an hmuh ngei a beisei thu sawiin, mipuite chu sorkar ṭawiawm turin a sáwm a ni.