Mamitah joint opera-tion vawi ruk nei

Mamit District Liquor Prohi­bition Coordination Committe chuan January 4, 2019 khan an chairman Shashank Jaiswal, Mamit SP kaihhruaiin a pisaah Krismas leh kum thar vuakveta joint operation an neih dan thlir letna hun an hmang a; Krismas leh kum thar vuakvetah joint operation ṭum ruk neih a nih thu an tarlang.

Meeting-a tarlan danin, Mamit District Liquor Prohibition Coordination Committe hi Decem­ber 21, 2018-ah din a ni a, Krismas vuakvêtah joint operation ṭum an nei. Rakzu fûn 85, zu bilh lai litre 300, sap zu (ûm chanve) ûm 54, sap zu (ûm puitling) ûm khat, beer can 9, ganja fûn 3 leh damdawi mûm 10 an man a; hmun pathumah zu siamna an tichhe bawk.

Zu kaihhnawihah mi pathum man an ni a, Motor Vehicle Act bawhchhia mi 61 man niin, pawisa chawitir zat chu Rs. 32,400 a tling. Mamit district chhungah Krismas leh kum thar vuakvêtah lirtheia chesual leh chhiatna lian tham a thleng lo a, kum hlui thlah zanah hâlpuah leh hâlmawi hâl hriat tur a awm meuh lo.

Shahshank Jaiswal chuan, boruak muanawm leh thlamuan­thlak tak hnuaia hunpui hman a ni chu venhimna lama thawktute thawh rah a nih thu leh lawmawm a tih thu a sawi. Meeting zawhah sap zu ûm 47 leh rakzu fûn sarih an mante chu leihbuak nghal a ni.

Meeting-ah hian Mamit Additional SP leh SDPO, Excise & Narcotics department-a Assis­tant Commissioner leh officer dang te, YMA Sub-headquarters Mamit hruaitute leh Mamit khawpui chhunga YMA branch hruaitute an tel.