Health Minister-in MSACS hotute a kâwm

Health minister Dr R Lalthangliana chuan January 4, Zirtawpni khan a pisaah Mizoram State AIDS Control Society (MSACS) hotute a kâwm a; Mizorama HIV/AIDS darh mek venna leh a dona kawnga hna thawhte a sawipui.

Dr R Lalthangliana chuan, MLA-te'n HIV/AIDS dona kawnga hma an lak theih dan tur leh MSACS hnathawhna atan a remchan dan anga Mizoram sorkar budget-a sum dah theih dan tur ngaihtuahpui a tum thu a sawi a; kohhran leh tlawmngai pawlte nena thawhhona tichak tura hmalak thuai a duh thu a sawi bawk.

Inkawmnaa MSACS project director Dr Lal­malsawmi Sailo-in a sawi danin, MSACS hnuaiah damdawi (drug)-a inchiu ṭhinte bakah, hmeichhe inzuarte leh mipa, mahni mipatpui kawp ṭhinte lama tum bik neia hmalakna, targeted interventions (TI) project hnuaiah non-governmental organisation (NGO) 37-in hna an thawk mek a; kum 2017-18 chhungin Mizoramah HIV kai hmuh chhuah thar mi 1,296 an awm.

Mizoramah HIV/AIDS darh mek venna hna thawktu MSACS-ah thawktu, office hmun nghak mi 44 leh service centre hrang hrangah mi 220 an awm mek a; kumin kum tìr lamah hian an pisa chu Mission Veng aṭangin Chaltlanga ZOHANCO office ṭhinah insawn an tum a ni.