KHAWTHLIR

Nimin khan kum 2019-a Pathianni hmasa ber a ni a, kohhran hrang hrangte'n sunday school hming ziah ní leh pawl siamrem ní atan an hmang. Presbyterian Kohhran chuan kuminah hian puitlingah 'Chanchinṭha hril' tih an zir dawn a, Baptist Church of Mizoram-in Thupuan an zir dawn. Salvation Army-in 'Saltang chhuah hnu zawlneite' tih an zir dawn a, UPC (NEI)-in 'Zawlnei tete' tih zirin, UPC (Mizoram)-in 'Matthaia ziak hrilhfiahna' an zir dawn a ni.

Mizoram Peoples Forum (MPF) general secretary atan Rev. R Lalnun-tluanga ruat thar a ni a, general secretary ni lai Rev.Dr R Lalbiakmawia a thlak ang. MPF general secretary hlui leh tharte hian January 10, Ningani khian MPF pisaah mawhphurhna (charge) an inhlan dawn a ni.

Lai Autonomous District Council (LADC)-a member pasarih nei mek MNF party chuan sorkar thar din tumin hmalak an tum nia thu dawn a ni. Thuthar thehdarhtute zawhna chhangin LADC-a MNF Legislature Party leader F Rohnuna chuan, Mizoramah MNF-in sorkarna an siam hnuah LADC-ah pawh MNF kaihhruai sorkar thar din ngei an inbeisei tih a sawi a, "Hmalak dan tur member dangte nen sawiho thuai tum a ni," a ti. LADC-ah hian elected member 25 awmin, Indian National Congress-in member 16 an nei a, independent pakhatin a thlawp. Hetih lai hian, Lawngtlai East bial aṭanga MLA atana thlan tlin H Lalbiakzauva chuan LADC-a a bial Lungtian a chhuahsan tawh a ni.

Lunglei East bialtu MLA Lawmawma Tochhawng chu Lunglei District High Power Commitee vice chairman atana dah a nih vangin lawmpuina hun Inrinni khan Lunglei Ramthar Veng khawtlangin V/C House-ah an buatsaih.  Lawmawma chuan ram leh mipuite rawngbawl tura thlan a nih avanga tih tur a neihte hlen chhuak ngei turin theihtawpa ṭan a lak tur thu a sawi.