Mizoram Larsap leh Chief Minister ten Mizoram mipui Remna Ni chibai an bûk

Vawiin June 30 hi sorkar laipui leh MNF-in inremna thuthlung an ziahna ni, Remna Ni vawi 41-na a ni a; Governor Gen. Dr Vijay Kumar Singh leh chief minister Lalduhoma te chuan Remna Ni thuchah tichhuakin, Mizoram mipui chibai an bûk.

Larsap chuan, Remna Ni chu Mizoram chanchina hun chhinchhiah tlak leh danglamna thlentu pawimawh tak a nih thu a sawi a, "Mizoram zalen, hmasawn leh ṭhang chak siam turin beiseina thar min pe a ni. Kum 40 kal taa inremna thuthlung ziah chuan kan ramah remna tluantling a thlen a, hun eng emaw chen buainain Mizoram a chiah chu titawpin, inpumkhatna, inremna leh hmasawnna lam hawiin bung thar min kaipui ta a ni," a ti.

Mizoramah remna leh muanna a awm theihna tura theihtawp chhuahtu zawng zawngte zahna chibai a bûk tih sawiin Larsap chuan, "Remna leh muanna a awm theih nan leh India ram state ralmuang ber kan nih theih nana nunna hlu tak hlantute kan hre reng a ni," a ti a, ram tana nunna hlantute beiseina chuan tun thlengin ram mipuiah phûrna a pek thu a sawi.

Gen. VK Singh chuan, Mizoram remna leh muanna chu tihchak deuh deuh a ṭul thu sawiin, "Remna leh muanna dik tak hi hmasawnna hrang hrang - zirna, sum leh pai deh chhuah, hmasawnna ruhrel siam, hriselna, hnam ziarâng vawnhim, thil thar chìn chhuah, sum peipun leh hmasawnna huapzo atantea innghahna bulthum pawimawh a ni. Hmabak hlen chhuah tur tam tak kan neih avangin theihtawp kan chhuah a ngai," a ti.

Remna Ni-ah hian inremna thuthlungin Mizoram tana a hnutchhiahte hlen chhuak turin ṭhahnemngai taka thawk tura intiam ṭheuh turin Larsap chuan Mizoram mipui a chah a ni.

CM Lalduhoma chuan, Mizoram mipui leh ram leh hnam tana nunna hlantute zawng zawng Remna Ni chibai a bûk a, "Rambuaiin kum 20 zet min chîm chhung khan ram hmasawnna hna a kal thei lo a, kum 1986-a remna leh muanna a awm aṭang khan mumal takin hmasawnna hna a kal ve thei ta chauh a ni. Kan ramin hma a sawn zel theih nan remna leh muanna kan vawn nun a pawimawhzia pawh min hrilh a ni," a ti.

Remna leh muanna hnuaiah Mizoramin hma a sawn chak thu sawiin Lalduhoma chuan, "India rama ziak leh chhiar thiam vekna state kan lo ni ta a, Sustainable Development Goals tihhlawhtlinna kawngah hmarchhaka ti ṭha ber zinga mi kan ni. Eirukna lama state fihlim ber zinga mi kan ni a, kan ram mawizia leh a chhunga cheng mipuite ṭhatzia hretu an pung a, khualzinin min rawn tlawh nasa hle a ni," a ti a; remna avangin hmasawnna a thlen belh zel dawn thu a sawi.

Chief Minister chuan, "Chak taka hmasawnna hna a kal theih chhan hi remna leh muanna vang a ni tih hriain, kan ram hi ram ralmuang takah i siam zel ang u," a ti.