Aadhaar update man la lo turin ngen

Naupang/tleirawlte a thlawna Aadhaar card siam leh tihnun (update)-na atana hmalak mekah, mi pakhatah Rs 100 zel lak a nih avangin, Mizoram Education department chu pawisa lak titawp tur leh, lak tawh pawh pe kir leh vek turin Mizoram Consumer Union (MCU) chuan an ngen.

MCU tarlan danin, Unique Identification Authority of India (UIDAI)-in September 29, 2025-ah hriattirna a chhuah a; naupang kum 5-7 inkarah Aadhaar number nei vek turin a ti a, kum 15-17 an tlin hunah Aadhaar chu update ngei ngei (mandatory biometric update) turin a ti bawk.

Mandatory biometric update chu October 1, 2025 aṭanga October 1, 2026 chhungin a thlawna tih tur a ni tih sawiin, MCU chuan, "Kan rama zirna-in hrang hrangah Education department-in hma lain a kalpui mek a. Hemi tih man hi naupang pakhat zelah Rs 100 lak ṭhin nia report dawn a ni a, hei hi Mizoram sorkara Education department-a thuneitute dan anga kalpui turin kan ngen a, pawisa lâk tawhte pawh pe kîr leh vek turin kan ngen a ni," an ti.