VB-G RAM G atan sorkar laipuiin Mizoram tan vbc 611.65 a pe tawh

30th June, 2026

MGNREGA thlaktu, Viksit Bharat - Guarantee for Rozgar and Ajeevika Mission Gramin (VB-GRAMG) chu naktuk July 1, 2026 aṭangin India ram pumah kalpui a ni dawn a; VB-GRAMG atan hian sorkar laipui chuan Mizoram tan cheng vbc 611.65 a pe tawh.

Ministry of Rural Development-in chuan nimin khan Delhi-ah sorkar laipui scheme-te sawihona - Rashtriya Gramin Vikas Sammelan an buatsaih a; VB-GRAMG bakah, National Rural Livelihood Mission (NRLM), Pradhan Mantri Awaas Yojona - Gramin (PMAY-G) leh scheme dangte chungchang sawiho a ni.

Rashtriya Gramin Vikas Sammelan-ah hian Union Rural Development minister Shivraj Singh Chouhan bakah, state hrang hranga Rural Development minister te an tel a, Rural Development & Administration minister Prof. Lalnilawma pawh a tel.

Sammelan-ah hian naktuk July 1, 2026-a hman ṭan tur VB-GRAMG atana inpuahchahna leh inbuatsaihna te sawiho a ni a; VB-GRAMG atan sorkar laipuiin Mizoram tan cheng vbc 611.65 a pek tawh thu leh, state matching share cheng vbc 67.95 pawh Mizoram sorkarin a tihfel tawh thu tarlan a ni.

Ram pumah VB-GRAMG hman a nih dawn tak avanga MGNREGA-a state tinte'n leiba an neihte leh sorkar laipuiin leibate chinfel a tum dan sawiho a ni bawk.

Prof. Lalnilawma chuan, VB-GRAMG-ah Mizoram chu state scheme siam hmasa ber a nih thu sawiin, "State rules hrang hrang ruangam peih vek a ni tawh. Internet connectivity chiangkuang lo chung chunga e-KYC leh face authentication-ahte Mizoram chu a sáng pawl kan ni," a ti a; MGNREGA hnuaia contract-a thawkte hlawh, central liability-te chinfel a nih vat theih nan Ministry of RD hotute a ngen.

Mizoram RD Minister chuan, National Rural Livelihood Mission-ah sorkar kum kal mek 2026-27 chhunga hmalak dan turte a sawi a; thingtlang nu hoin awlsam leh hlawk zawka sorkar laipui scheme-te an chhawr theih nan Mizoram chu a bik taka ngaihtuah turin Union Minister a ngen. PMAY-G-ah AwaasPlus Survey zawh a nih veleh sum pe turin a ngen bawk.

Prof. Lalnilawma hi RDA department hotute'n an ṭawiawm a ni.