National Statistics Day hman a ni

Nimin June 29 kha National Statistics Day a ni a, Directorate of Eco-nomics & Statistics chuan an conference hall-ah an hmang a, Information & Communication Technology (ICT) minis-ter Dr Vanlalthlana'n a hmanpui.

National Statistics Day hmanna inkhawm hi Planning secretary David Lalthantluanga'n a kaihruai a, khuallian Dr Vanlalthlana bakah, Economic & Statistics director B Lalrinhlua leh ICT informatics officer Lalrinfela ten thu an sawi.

Chawhnuah Statistics Day thupui thupui chu, 'Unlocking the potential of administrative data' tih zirho a ni a, Economics & Statistics assistant director Lalhmangaihsangi'n thupui a sawifiah a; sawihona leh zawhna leh chhanna hun hman a ni.

Dr Vanlalthlana chuan, khawvel ṭhang zel leh changkang zelah data leh statistic pawimawhna a lang chiang telh telh tih a sawi a, "Ṭha taka kal turin sorkarin data dik leh rintlak a mamawh a, thuthlukna fel leh dik siam nan stattistics dik neih hi thil pawimawh ber pakhat a ni. Data dik neih mai bakah, data phêna thil thlen chhan chhui a pawimawh," a ti.

Khuallian hian ICT department leh Economics & Statistics thawk dunin an siam, 'Mizoram Civil Registration System (CRS) Portal' a tlangzarh. CRS hi Mizoram puma piang leh thi chhinchhiahna tura siam a ni a, sorkar laipuia CRS portal nena inchâwm tawn thei tura duan a ni.

National Statistics Day hi statistician ropui, Father of Indian Statistics tia chhàl Prof. Prasanta Chandra Mahalanobis pian champha June 29-ah kum 2007 khan hman ṭan a ni.