KHAWTHLIR

Thisen pe

Central Higher Seconday School NSS unit chuan nimin khan thisen pek an huaihawt a, Civil Hospital, Aizawl Blood Bank-ah kalin thisen unit 25 an pe a, petute mipa 19 leh hmeichhia paruk an ni.

Gram Dukan dawr hawng

UDPA department leh NABARD chuan Khawzawlah self help group-te thil siam leh thar chhuah zawrhna tur Gram Dukan a buatsaih a, nimin khan Khawzawl bawrhsap K Vanlalṭhiana'n a hawng. Gram Dukan SHG dawr atan hian grant support Rs 3,73,000 hmuh a ni.

Sarâng khap

Serchhip bawrhsap Paul L Khuma hoin nimin khan sorkar hotute leh khawtlang hruaitute'n Serchhip district-a khualzinte tlawh ṭhin pali - Vety Farm Dilpui, Vantawng Khawhthla, Tuirihiau leh Golf Course & Resort tea hman khat daih sarâng khap chungchanga hmalak dan tur an rel. Hmalakna tur hrang hrang duante chak taka bawhzui ni se, an ti.

Bawlhhlawh sawngbawl

Lunglei District Water & Sanitation Mission chu additional DC Zoramdini hoin nimin khan an ṭhu a; bawlhhlawh sawngbawlna dan thar, Solid Waste Management Rules, 2026 zulzuia Supreme Court thupek bawhzui dan turte an rel. Bawlhhlawh ṭawih thei, ṭawih thei lo leh hman nawn theih, mihring thlì leh damdawi, electric leh rawng lam chi bawlhhlawhte thliar hran leh him zawka sawngbawl leh thehthang dan tura PHE department ruahmanna an pawm.

DMF fund sawiho

Serchhip District Mineral Foundation (DMF) Governing Council chu nimin khan an ṭhukhawm a, district bawrhsapin a kaihruai. DMF fund-te ṭha taka hman a nih theih line department-te chu an mamawhnate zir chiang tura tih an nih bakah, theihtawpa vil leh illegal miners-te zawn chhuah an nih theih nan YMA leh VC-te nen thawhhona ṭha tak neih a ṭul thu an sawi.