Larsapin Governor's Unit Citation hlan

Nimin khan Lok Bhavan-ah Assam Rifles Investiture Ceremony buatsaih a ni a; Governor Gen. Dr Vijay Kumar Singh-a'n 20th Assam Rifles hnenah hnathawh ṭhat chawimawina 'Governor's Unit Citation' a hlan.

Larsap chuan, 20th AR hnenah Mizorama an awm chhunga an hnathawh entawn tlak tak avanga chawimawina hlan a ni chu a lawmpui thu a sawi a, "Indo-Myanmar ramri buai laia ramri venhim hna thawh kawnga in battalion hmalaknate a chhuanawm. Enforcement agency dang leh intelligence unit lamte nen ṭha taka thawkhoin, ramri kaltlanga ruihhlo tawlh leh dan loa sumdawnna hrang hrang vennaa in hnathawhte a fakawm hle a ni," a ti.

AR-in India hmarchhak venhimnaa an thawhnaah, tlang mite ṭhian an nih anga khawtual mite rawngbawlna hrang hrang ṭha taka an thawk ṭhin chu fakawm a tih thu sawiin Gen. VK Singh chuan, "AR thuvawn 'Seva, Suraksha and Bandhutva (rawngbawlna, venhimna leh inunauna)' a takin in pholang a ni," a ti a; Mizoram tana 20 AR hnathawh leh thil hnutchhiahte chu hriat reng a nih tawh dawn thu a sawi.

Chawimawina inkhawmah hian Assam Rifles 23 Sector DIG Brig. Puspendar Sorayan, Pushpak chief engineer Krashnendra Singh, 20th AR commandant Col. Jaswinder Singh leh Mizorama Assam Rifles hotu dangte an tel.

20th Assam Rifles hi Novem-ber 12, 2023 aṭanga March 19, 2026 chhung khan Lunglei battalion (Lunglawn)-ah an awm a ni.