Champhai dist-ah thla khat chhungin ruihhlo kaihhnawih thubuai 38 a lut

Champhai Police leh Excise & Narcotics department (END) chuan May 26 - June 28, 2026 chhung khan ruihhlo kaihhnawihah mi 47 manin, thubuai 38 an ziak lut. Drug license nei loa damdawi zuar mi pathum man an ni bawk.

Champhai District NCORD Committee chu nimin khan DC conference hall-ah additional DC Lalbiakfela hoin an ṭhukhawm a; May 26, 2026 aṭanga June 28, 2026 chhunga dan leh thupek kengkawhtu hrang hrangte'n ruihhlo an man dan leh hmalak dante thlirho a ni.

Ṭhutkhawma tarlan danin, Champhai police-te chuan May 26 - June 28, 2026 chhung khan ruihhlo - heroin kg 2.156 leh methamphetamine kg 63.554 an man a; ruihhlo man kaihhnawihah mi 28 manin, NDPS Act tlawhchhanin thubuai 23 an ziak lut. Mi an man zinga 10 chu Myanmar mi an ni a, mi 18 India khua leh tui an ni.

Champhaia END chuan May 26 - June 8 chhung vêkin heroin gram 514, methamphetamine gram 950, ganja gram 188, nitrazepam gram 770 leh altrazolam gram 42.240 manin, mi 19 an man a, NDPS Act tlawhchhanin thubuai 15 an ziak lut.

Assam Rifles-in June 2026 chhungin Champhai district-ah heroin gram 381.36 leh methamphetamine mûm 9,786 an man a; ruihhlo an mante chu Champhai Police leh Excise & Narcotics department hnenah an hlan a ni.

Champhaia Food & Drug Administration hotute chuan police-te puihnain damdawi zawrh phalna license nei loa damdawi zuar mi pathum leh an damdawi zawrh lai cheng nuai 227 hû an man bawk.