Birth certificate lem a tam avangin DC-in fimkhur turin official-te a chah

Lawngtlai district bawrhsap Donny Lalruatsanga chuan, tun hnaiah birth certi­ficate lem a tam thu leh birth certificate pek chhuahah fimkhur thar a ṭul thu a sawi a; uluk zawka document endik ṭhin turin sorkara mawhphurhtute a chah.

Nimina Lawngtlai District Coordination Committee ṭhut­khawmah Donny Lalruatsanga chuan, tun hnaiah birth certificate lem a tam thu a sawi a, "Document dik lo siama birth certificate lem siam ṭhinte zawn chhuah a, hrem ngei an nih theih nan District Administration chuan theihtawp a chhuah a, a bik takin Non Availability Certificate (NAC) pek chhuahah sorkar official-te fim­khur zual a ṭul," a ti.

Lawngtlai Bawrhsap chuan, uluk zawka document endik ṭhin tur leh India khua leh tui dik tak hnenah chauh hriatpuina lehkha pe ṭhin tur sorkar official-te a chahin, birth certificate pek chhuahah khauh zawka kal a nih tur thu a sawi. VC, YLA, YCA leh kohhran te pawhin mawhphurhna sang tak an neih thu sawiin, thawhpuiah a sawm a ni.

ṬHUTKHAWMA RORELTE

✓ Sorkar official leh VC, NGO leh kohhran ten mawhphurhna an neihte ṭha taka hlen ni se.

✓ Veng chhung mi leh sa ngei a ni tih hriatpuina lehkha siamah ṭan lak nasat a ṭul a, VC tinte'n fimkhur zawkin hma la se.

✓ Kohhran aṭanga lehkha pek chhuahah fimkhur thar ni se.

✓ Hnam leh chi bil inthliarna awm loa danin a phût angin, dik takin certificate pek chhuah tur a ni a, mahni zâwnah ṭheuh theihtawp chhuah zel ni se.