Lunglei district-a naupang 10,595 hnenah zenghri danna pek tum a ni

Lunglei District Task Force on Immunisation (DTFI) chuan nimin khan an chairman Navneet Mann, bawrhsap hoin naktuk July 1, 2026-a National Immunisation Day (NID) hman dan tur an thlir. NID 2026-ah hian Lunglei district-a naupang kum 5 hnuai lam 10,595 hnenah zenghri danna pek tura ruahman (target) a ni.

Navneet Mann chuan, hriselna lama thawktu te, department hrang hrang, tlawmngai pawl, khawtlang hruaitute leh mipui thawhhona leh ṭawiawmna avangin hri danna pekah Lunglei district-in hlawhtlinna ṭha tak a hmuh ṭhin thu a sawi a, "NID 2026-ah pawh hri danna la thei zawng zawngin an lak vek theih nan theihtawp chhuah ila, nu leh pate pawh an fate hri danna laktir ṭheuh turin ka ngen a ni," a ti.

NID hi Mizoramah chuan naktuk (July 1, 2026) hian hman a ni dawn a, zenghri danna pek beihpui thlak (pulse polio immunisation) ní atan hman a ni ang. Lunglei district-ah chuan zenghri danna pek tur target naupang kum 5 hnuai lam 10,595 an awm. July 1-ah khaw hrang hranga booth 190 leh Lungleia transit point pathumah hri danna pek a ni dawn a; naktuka pek hman lohte chu July 2-3 chhungin pek an ni ang.

ṬHUTKHAWMA TARLANTE

☑ March 16, 1995-ah India ramah NID hman ṭan a ni a, zenghri danna pek beihpui thlak a ni.

☑ India rama zenghri vei hmuh chhuah hnuhnun ber chu January 13, 2011 kha a ni a; March 27, 2014 khan World Health Organisation chuan India ram chu zenghri awm lohna ram (polio free)-ah a puang.

☑ India ram ṭhenawmah zenghri hmuh a la nih avangin zenghri danna pek chhunzawm zel a ni.

☑ February 28 - May 31, 2026 chhungin chhùl hmawr cancer thlentu Human Papillomavirus (HPV) laka invenna tur vaccine pek rûnpui neih a ni a, Lunglei district-ah tleirawl 1,243 hnenah vaccine pek tum a nih laiin, 1,326 (107%) hnenah pek a ni.