MLA-te'n remna pawimawhzia an sawiho

Zoram Research Foundation, India Peace Centre leh Aijal Club te chuan Remna Ni vawi 41-na pualin nimin khan State Planning Board meeting room-ah ‘40 Years of Harmony: Legislative Dialogue on Peace Building’ tih thupui sawihona an buatsaih a, Assembly deputy speaker Lalfamkima'n a hmanpui.

Sawihona inkhawm hi Zoram Research Foundation committee member Rev. Dr Lalchungnunga’n a kaihruai a, India Peace Centre director Michael Angelious-a'n thupui a sawi. MLA ni mekte leh lo ni tawh ṭhinte an tel a ni.

Lalfamkima chuan, kum 1986 hma lamah chuan Mizoram chu silai puak thâwm leh nunau mangang aurâwlin a khat ṭhin tih sawiin, "Remna kan neih hnuah chuan hlauhna tel loin Mizoramin ropui zawngin hma lam a pan a. Inremna kan neih theihna atana thawktu hruaitu hmasa Pu Rajiv Gandhi te, Pu Laldenga te, ram hruaitute leh kohhran khawtlang hruaitute inpekna thûk tak vang a ni," a ti.

Deputy Speaker chuan, Mizoram Peace Accord chu khawvel hriatah pawh hlawhtling leh chhuanawm tham a nih thu sawiin, "Peace Accord dang hlawhchham tam tak karah Mizo Peace Accord erawh nghet takin a ding zel a ni," a ti a; remna hlutzia hre reng chunga Peace Accord vawnhim zel chu an mawhphurhna a ni tih hre turin MLA ni mekte leh lo ni tawh ṭhinte a chah.

Sawihonaah hian MLA leh MLA hluite chuan kum 1986-a Mizoram Peace Accord ziah a nih aṭanga tun thlenga Mizoramin remna tluantling a neih dan te, inremna ngêlnghet tak a awm avanga Mizoram hma-sawn dan te, remna hlutzia te an sawi a ni.