KHAWTHLIR

ṬKP-in thisen pe

ṬKP, Lunglei Rahsi Veng Bial chuan nimin khan Venghlun BCM Kohhran hall-ah thisen pek an huaihawt a, Civil Hospital, Lunglei tan thisen unit 26 an pe a, petute mipa 24 leh hmeichhia pahnih an ni.

Heroin man

Mizoram Police leh Assam Rifles chuan June 29, Thawhṭanni khan Seling daiah Manipur lam mi pakhat hnen aṭangin heroin gram 150.97 (hawng 4) an man. June 28, 2026 pawh khan AR leh Police thawk dun chuan Khawzawl-Sinzawl kawngah heroin gram 837 (hawng 64) an man a, a neitua puh mi pahnih an man bawk.

Lawngtlai SWMS

Lawngtlai bawrhsap Donny Lalruatsanga chuan nimin khan Lawngtlai Solid Waste Management System siam mek a tlawh a, theihtawp chhuaha thawk zel turin contractor a hrilh. Lawngtlai SWMS hi UDPA department hnuaiah Rs 6,97,70,000 sênga siam tur a ni a, October 2024 khan hna ṭan niin, kum hnih chhunga zawh tur a ni. Contractor chu Lalfamkima, Aizawl a ni a, hna thawh tur aṭanga 80% zawh a ni tawh.

PYD-in thing phun

UPC (NEI) hnuaia Aizawl East District PYD Environment Protection Committee chuan nimin khan Champhai kawng lama Tuirini kamah hnatlangin thing an phun. Thing ṭiak 50 vel an phun a, Seling Forest Range officer R Vanlalropeka leh ASEP hruaitute'n an hmanpui a ni.

YMA Hall hawng

Central YMA president R Lalngheta chuan nimin khan Bilkhawthlir Kualmawi YMA Hall thar a hawng. Hall sakna atan Rs 1,93,67,900 sên a ni a, March 5, 2024-ah sak ṭan niin, a dung ft 75 leh a vâng ft 39-a zauin sak a ni a, a saknaah hnam dang chhawr a ni lo.