Mizorama damdawi-in leh sub-centre 121-in NQAS certification an hmu tawh - Lalrinpuii

Health & Family Welfare minister Lalrinpuii chu nimin khan Vigyan Bhawan, New Delhi-a 16th Conference of the Central Council Health & Family Welfare-ah a tel a; Mizorama sorkar damdawi-in leh sub-centre 121-in NQAS certification an hmuh tawh thu a sawi.

Lalrinpuii chuan, Mizoramin Sustainable Development Goals (SDGs) tihlawhtling tura a hmalakna kal zelah, nausen thi zat tehna (Neonatal Mortality Rate)-ah Mizoram chu 9 (nau piang 1,000 zelah mi 9 thi) leh, naupang kum 5 hnuai lam thi zat tehnaah 18-ah a tlak thlak tawh thu a sawi a, "Hri venna damdawi pekah pawh state data-ah chuan 90% lai kan ni," a ti.

Health Minister chuan, natna inkai chhawn theih loh (non communicable disease) lamah nasa takin inzirtirna neih a nih bakah, damdawi sem a nih thu a sawi a, "Quality service pek chhuah lamah Mizoram state chhunga health facility 121 laiin NQAS certification an nei tawh," a ti a; ngawr (TB) rinhlelhawmte x-ray hmanga endik tam lamah Mizoram chu India rama ti ṭha ber a nih thu a sawi.

NITI Aayog-in tehna hrang hrang a siam hmanga Aspirational District-te a endiknaah Mamit district chu Health & Nutrition sector-ah India rama ti ṭha pathumna a nih thu sawiin Lalrinpuii chuan, "Health facility zawng zawngah Ayushman Bharat Digital Mission hmalakna kalpui a ni a, urban health and wellness centre tinah esushrut clinic system hman a nih vek bakah, mirethei zawkte tana Central sorkar siam ABPMJAY chu convergence hlawhtling taka kalpui a ni," a ti.

HFW Minister chuan, Mizoram mipui zawng zawng huapin state sorkarin hlawhtling takin Mizoram Universal healthcare Scheme a kalpui mek thu a sawi bawk.

Inkhawmpuiah hian Union Health minister JP Nadda chuan, tun hmain damlo enkawlna (curative) lam ngaih pawimawh a ni ṭhin a, tunah chuan enkawlna bakah, a venna lam, mipui zirtir, palliative leh rehabilitative lam sorkarin a kalpui tawh thu a sawi a, "Independence kum 100-na (kum 2047)-ah developed country kan nih theih nan Vikshit Bharat 2047 duan a ni a, hei hi mipui hrisel tel lo chuan tihhlawhtlin theih a nih loh avangin mipui hriselna sorkarin a ngai pawimawh a ni," a ti.

Conference of the Central Council of Health & Family Welfare hi Union Health Minister kaihhruainaa state hrang hrang health minister-te telna niin, hriselna lama India ram pum huap rorelna sang a ni a; India rama hriselna lama hmalakna hrang hrangte thlirho niin, hmasawnna turte rel ṭhin a ni.

Meeting rual hian hriselna lama hmalakna atana ṭangkai - National Ambulance Service Guidelines te, Suman Roadmap 2030 te, Samagra Shosu Bal Swasthya Karyakram te, Anaemia Mukt Bharat Abhiyaan bakah, Ayushman Bharat Digital Mission hnuaia hmalakna hrang hrang - Aarogya Setu 2.0 te, Ayushman app te, Drug Registry te, Unified Health Interface te bakah Sushrut Lite te chu tlangzarh a ni bawk.

Health minister Lalrinpuii hi health Services director Dr Lily Chhakchhuak, NHM mission director Dr R Lalchhuanawma leh Health under secretary H Lalhruaitluanga ten an ṭawiawm a ni.