Kolasib cheina tur MHIP-te hnenah sem

Kolasib khawpui chei mawina tur pangpar khawina leh leiṭha eng emaw zat chu nimin zing khan Kolasib Bawrhsap Banglaah Kolasib-a MHIP branch-te hnenah sem a ni a, bawrhsap H Dolianbuaia'n a hmanpui.

Pangpar khawina leh leiṭhate hi Kolasib khawpui huam chhunga MHIP branch hrang hrang - Rengte-kawn, Tuiṭhaveng, Khuangpuilam, Diak-kawn, New Diakkawn, Venglai, Vengthar, Gosen veng, New Builum, Hmarveng, Ṭumpui, Venglai East, College Veng, Jail Complex leh Saidan branch-te hnenah sem a ni.

Pangpar khawina plastic pot 220, plastic pot khai chi 12 leh tyre chei sa 176 sem a ni a; veng tin MHIP-te hnenah leiṭha ip khat ṭheuh sem tel a ni bawk.

Kolasib Bawrhsap chuan, Kolasib chu khualzin tam takin an paltlang khawpui a nih thu sawiin, "Khualzinte mit la tur khawpa khawpui mawi leh fai nih a chakawm. Kolasib khawpui huam chhunga sorkar hmunhmate phak ang tawka chei ṭhat leh tuaihnûm tum a ni," a ti a; pangpar khawina tur dawngtute chu an veng ṭheuh mawi taka chei turin a ngen.