Remna Ni pualin zirhona buatsaih a ni

Zoram Research Foundation leh Aijal Club chuan Remna Ni kum 40 tlin, ruby jubilee pualin nimin khan BSI Hall-ah 'From the frontlines of '66 to 40 years of peace" tih zirhona leh sawihona an buatsaih a,

Governor Gen. Dr Vijay Kumar Singh-a'n hmanpuiin, 'The Case Study of the Enduring Legacy of the Mizo Peace Accord' project a tlangzarh.

Governor chuan, Mizoram Peace Accord chu inremna danglam bik leh chhinchhiah tlak a nih thu a sawi a, "Mizoram Peace Accord ziah a nih hnuah Mizoramah buaina a awm leh tawh ngai lo hi a ropui a, remna leh muanna a awm theihna atan mi tinin thâ an thawh avangin he inremna hi Mizoram mipui zawng zawng ta a ni," a ti.

Mizoram Peace Accord chu inremna, hruaitu ṭha leh mipui sorkar siam tura intiamna a taka tih puitlinna a nih thu sawiin Larsap chuan, "Hei hian kum 20 rambuaina a titawp a, remna, nghehna leh hmasawnna a rawn her chhuahtir a ni," a ti a; Peace Accord chu khawvel huapa inremna thuthlung entawn tlak tia hriat a nih thu a sawi.

Gen. VK Singh chuan, hun kal tawhah ringawt insáwrbing lo a, Mizoram hma lam hun thlira Remna Ni puala hun hman a ni chuan rah ṭha a chhuah ngei a beisei thu a sawi a; khawtlang tihmasawn turin mahni in luma awm reng lo a, hawiher tizau tura state pawna vah chhuah tam a ṭul thu a sawi bawk.

Remna Ni ruby jubilee pual hian StratNewsGlobal siam, 'Mizo Peace Accord Documentary Series' tih chu thlirho a ni a; journalist Nitin A Gokhale (conflict reporter & strategic analyst) kawmna ngaihthlak a nih bakah, author & filmmaker Sanjoy Hazarika pawhin thu a sawi.

Chawhnuah 'Frontlines of the past: Conversation with veteran press corp' tih thupui hmangin hun hman a ni a; Lok Sabha MP hlui C Lalrosanga, IPR director hlui LR Sailo, AIR announcer/newsreader hlui Lalramliani Hnamte leh Mizo Aw editor hlui DR Zirliana ten thu an sawi a ni.