Aadhaar siamnaa pawisa latute chhui mek

School Education director Angela Zothan-puii chuan thuchhuah siamin, sikul naupang kum 5-17 inkar tana Aadhaar enrolment ennawn leh siamṭhatna kalpui mekah pawisa (fee) la an awm chu pawi an tih thu leh, pawisa latute chhui mek a nih thu an tarlang.

School Education Director chuan, Unique Identification Authority of India (UIDAI)-in state tinah Aadhaar enrolment ngawrh taka an kalpui ṭhin thu a tarlang a; "September 19, 2025 leh September 29, 2025-a lehkhaah, Aadhaar enrolment chungchangah naupang kum 5-17 chu kum khat chhung (October 2025 - October 2026) a thlawna Aadhaar enrolment leh update ti turin thuchhuah a siam. Hemi bawhzui hian Directorate of School Education chuan a thlawna kalpui tawh tur a ni tih district tinte hnenah hriattirna a pe chhuak tawh," a ti.

District ṭhenkhatah UIDAI thuchhuak kalhin naupang aṭanga processing fee la an awm thu Mizoram Consumer Union-in an sawi chu chu pawi an tih thu tarlangin Director chuan, "Fee lo la rute hi chhui mek an ni," a ti. Aadhaar enrolment tih thar leh update chu tihmakmawh a nih avangin School Education department chuan kalpui zel an tum a, theihtawpa ṭanpuia leh thawhpui turin mi tin a ngen a ni.

SCHOOL EDUCATION THUCHHUAK

☑ UIDAI-in state tinah Aadhaar enrolment hi hna pui bera neiin an kalpui ṭhin.

☑ Mizoramah General Administration department-in a khaikhawm.

☑ Aadhaar enrolment hi ṭha tak leh huap zo taka a kal theih nan WCD department, NHM/Health department, DC, School Education department, Bank & Public sector unit te, Post Office-a mite chu sub-registrar atan ruat an ni.

☑ School Education department-in Samagra Shiksha hnuaia BRC leh CRCC staff ṭhenkhatte hmangin Aadhaar enrolment leh mandatory biometric update (MBU) camp an buatsaih ṭhin.

☑ Hlawh dang nei loa an kal chhuah ṭhin avangin new enrolment leh update-na atan mi pakhat (per head)-ah UIDAI aṭangin fee lak phalna an nei ṭhin.

☑ Enrolment fee hi an ei leh in, vah velna leh lehkha, etc. mamawh phuhrûkna atan a ni a, department-ah chhung lut tura phût an ni lo.

☑ UIDAI-in naupang kum 5-17 inkarte chu October 2025 - October 2026 chhung a thlawna Aadhaar enrolment leh update ti turin thuchhuah a siam.

☑ UIDAI thu bawhzuiin Directorate of School Education chuan a thlawna kalpui tawh tur a ni tih district tinte hnenah a hriattir tawh.

☑ Fee lo la rute hi chhui mek an ni.