Mizoram Governor-in Republic Day-ah Congress sorkar hna thawh ṭhatzia a tarlang - Congress party

January 26, Pathianni zinga Lammuala Republic Day lawmnaah Governor PS Sree­dharan Pillai-a'n Congress party kaih­hruai Mizoram sorkarin  economic development lama hna an thawh ṭhat-zia chiang takin a sawi chhuak tih, Mizoram Pradesh Cong­ress Committee (MPCC) chuan an tarlang.

MPCC chuan, kumin Republic Day hmannaah Governor-in, 'Kum 2012-2018 chhung khan Mizoram hmasawnna chu chawhrualin 12.75% a ni a, hetiang taka kal tluan hi kan la nei ngai lo... Hetiang zela kan kal a nih chuan, kum 10 chhungin retheihna ûm boin, state intodelh leh sum lak luh inrualkhai tak kan la ni mai ang tih ka ring nghet tlat a ni,' tiin a sawi tih an tarlang a; "He hmasawnna nasa tak thleng hi MNF sorkar hian a chhawm nun zel kan duh a, chutiang tur chuan hei hi chonaah ngai se kan duh," an ti.

Congress party kaihhruai sorkar liam taah tihsual leh rah pelh eng emaw zat a awm chungin hmasawnnaah leh sorkar sum leh pai enkawlna kawngah chuan theihtawp chhuah a ni ṭhin tih sawiin MPCC chuan, "Sum leh pai awmze nei taka a enkawl avangin state GDP aṭanga chhûta leiba punna pawh Congress sorkar laiin nasa takin a tlahniam a, hmasawnna dinhmun tehna hrang hrangah pawh Mizoram dinhmun a ṭha hle a ni," an ti a; Mizoram chu chàwmhlàwma awm ringawt lo a, thawh chhuah nei state-a siam tum a nih avangin sum lak luhna tur an dap nasat thu an tarlang.

Governor-in a sawi angin, Congress sorkar lai, kum 2012-2018 chhunga Mizoram hmasawnna chawhruala 12.75% a tling chu Mizoramin a la tawn ngai loh a ni tih sawiin, MPCC chuan, "India ram pum hmasawnna ai pawhin a sang zawk hial a ni. India ramin economy tlakhniamna nasa tak a tawn lai a nih avangin sorkar sum an hman danah MNF sorkar a inenfiah a, a insiamṭhat hle a ngai niin kan hria," an ti bawk.