Kum 5 hnuai lamte zenghri venna pe

Health & Family Welfare minister Lalrinpuii chuan nimin khan Directorate of Health Services conference hall-ah National Immunisation Day (NID) - Pulse Polio Programme a hawng a; district hrang hrangah hman a ni bawk. Mizoramah naupang kum 5 hnuai lam 1,02,830 hnenah zenghri venna damdawi pek tum a ni.

Inkhawma tarlan danin, naupang kum 5 hnuai lamte chu NID-ah zenghri venna damdawi (káa thlawr) pek ṭhin an ni. NID Pulse Polio pualin Mizorama district 11-ah naupang kum 5 hnuai lam 1,02,830 hnenah zenghri venna damdawi pek tum a ni a, pekna hmun (immunization booth) 1,430 siam a ni.

Aizawla NID hmannaah hian naupang kum 5 hnuai lam mi 19 hnenah zenghri venna damdawi pek nghal a ni a, district dangahte pawh hman niin, zenghri danna pek a ni. NID pual hian Mizoram hmun tinah damdawi lama thawkte'n naupangte hnenah zenghri venna damdawi an pe zui ang.

HFW Minister chuan, India ram chu kum 2014-ah zenghri awm lohna ramah puan a nih tawh thu a sawi a, "Mizoramah pawh vaccine lak nachâng kan hria a, zenghri awm lohna state (polio free state) kan nih reng theih nan ṭan kan lak zel a pawimawh. Chhùl hmáwr cancer venna damdawi (HPV vaccine) pekah Mizoram hi India ramah pathumna kan ni a, pakhatna ni ngei tura kan ṭan a ngai," a ti.

Minister Lalrinpuii chuan, Mizoram mipui nuai 16 vel tan healthcare ṭha tak kalpui theih a nih thu sawiin, "Mipui pawhin sorkar min beiseina a sang hle. Mipui kan tlem rualin hriselna dinhmun tehnaah pakhatna kan nih reng nan ṭan lak a pawimawh. Veng tinah nu leh pa tam takin polio vaccine dawng turin an fate an rawn hruai hi a lawmawm," a ti a; Mizoram chu NQAS certification leh IMR, MMR-ahte a ti ṭha pawl a nih avangin 'eligible state' zinga a tel thu a sawi.

Tarlan danin, India rama zenghri vei hmuh hnuhnun ber chu kum 2011 khan hmuh chhuah a ni a, World Health Organisation chuan kum 2014 khan India ram chu zenghri awm tawh lohna ramah a puang.

India ram chu zenghri awm tawh lohna ram ni mah se, ṭhenawm ram - Myanmar, Bangladesh leh Afghanistan ramahte zenghri hi a la awm avangin inven a ngai a, zenghri venna damdawi la pek zui zel a ni a; June 28 hi ramah NID (Pulse Polio Day) atan hman ṭhin a ni.