Khua leh tui dik chauh thun tura huaisen taka hma la turin ngen

NGO Coordination Committee chuan, Electoral Roll Special Intensive Revision (SIR) 2026 kalpui mekah, inthun belh leh paih (claims & objections) dilna hun hawn a nih hunah khua leh tui dik tak chauh thun an nih theih nan huaisen taka hma la turin a buaipuitute an ngen.

NGOCC-a tel pawl hruaitute chu nimin khan Central YMA Committee Room-ah an ṭhukhawm a; Election Commission of India (ECI) ruahman anga SIR 2026 neih mek chungchang an ngaihtuah a ni.

NGOCC chuan thuchhuah siam nghalin, SIR-ah enumeration form-te ECINET-a thun luh zawh a ni chu lawmawm an ti a, thawktu zawng zawng chungah an lawm thu an tarlang a, "Ni 5.7.2026 aṭanga ni 4.8.2026 chhunga inthun belh leh paih dilna hun hawn turah hian, India khua leh tui dik tak chauh roll-a thun an nih theih nan huaisen taka hma la turin a buaipuitu - ERO/AERO/ BLO-te kan ngen," an ti.

SIR 2026-a hearing neih hunah khua leh tui dik takte chauh Electoral Roll-ah thun an nih theih nan NGO hrang hrangte chu an huam chhung ṭheuhah uluk taka lo vil zui turin NGOCC chuan an ngen bawk.