Thla thum chhungin Aizawlah footpath-a lirthei dah 17 man

Aizawl Traffic Police chuan kumin April leh June thla inkar, thla thum chhung khan Aizawl kawngpui sira kea kalna (footpath)-a lirthei dah 17 an man a, an mante chu pawisa an chawitir ṭhin.

Traffic Police hotute chuan, footpath-a lirthei dah (park) an mante chu The Motor Vehicles Act leh dan dangte hmanga an hrem thu leh, hremna chu pawisa chawi a nih thu an sawi. Khawpui chhungah kea kalte an him zawk nan khauh taka hmalak zui zel an tum thu an sawi bawk.

Aizawl Traffic Police chuan nimin khan Aizawla hmun hrang hrangah 'Footpath-ah lirthei din loh tur' tih thuziak an tár a ni.

Zawhna chhangin Traffic Police hotute chuan, 'Footpath-ah lirthei din loh tur' tih thuziak chu Aizawla hmun 50 velah an tàr thu an sawi a, "Zebra crossing-ah din loh tur tih thuziak kan tar ang bawkin lehkha kan târ hi mipui zirtirna (awareness) atan a ni," an ti.