KHAWTHLIR

Ruihhlo hâl ral

Lunglei District Disposal Committee (DCC) chuan nimin khan Lunglei AP Tlanga Incinerator Centre-ah heroin no. 4 gram 117 an hâl ral. Ruihhlo hâlte hi Rs 23,40,000 hû a ni a, Lunglei Judicial Magistrate First Class I-in pre-trial disposal phalna a pek anga hâl a ni. Hâlnaah hian Lunglei DCC member - Lunglei SP, SDO (Sadar), Excise & Narcotics Assistant Commissioner leh Lunglei SDPO te an tel.

Lirthei khû endikna

Mizoram Pollution Control Board (MPCB)-in lirthei khû a endikna, MINECO pengṭhuam zau laia an buatsaih chu MPCB pisa bulah an sawn a; lirthei khû endiktir turte chu vawiin July 2 aṭang chuan MPCB pisa pan tawh turin an chah. MPCB pisa hi MINECO-a Khatla thlânmual panna kawng tawntirhah a awm a ni.

MLA-in hmanpui

South Tuipui bialtu MLA Jeje Lalpekhlua chuan nimin khan Khawzawl District Football Association General Body Meeting a hmanpui. Khawzawl DFA inkhawmpui hi Hlunbuang Picnic Spot-ah neih a ni a, DFA senior vice president Robert Lalthlamuana’n a kaihruai. Jeje Lalpekhlua hian Khawzawl district mi, football-a inelnaa che ṭha mi pasarih hnenah chawimawina a hlan a ni.

Kuhva rah man

Assam Rifles sipaite chuan June 27, 2026 khan Saitual district-a Khuangphah ram chhungah ram pawn aṭanga lak luh nia hriat kuhva rah tawlhruk kg 9,100 an man a, cheng nuai 63.7 hùa chhût a ni. Kuhva rah manna truck-a chuang mi pali an man nghal a, Customs hnenah an hlan chhâwng a ni.

Special Lecture

Mizoram Peace Accord ziah kum 40-na pualin nimin khan Aizawl Theological College-ah Special Lecture buatsaih a ni. Zirhona hi Zoram Research Foundation, Aijal Club, NCCI hnuaia India Peace Centre leh ATC te buatsaih a ni a, NCCI India Peace Centre director Michael Angelious-a'n 'Sustaining the Peace Accord: 40 Years and Beyond' tih thupui a sawi.