Minister-in sorkar laipui hotute a kâwm

Minister of state Lalnghinglova Hmar chuan nimin khan Delhi-ah sorkar laipuia Tourism secretary Bhuvnesh Kumar leh Narcotics Control Bureau director general Anurag Garg te a kâwm a; Mizoram kaihhnawih thil pawimawh hrang hrang a sawipui.

Lalnghinglova Hmar hi Tourism Secretary pisaah Bhuvnesh Kumar nen an inkâwm a, Mizorama tourism project kalpui mekte leh hmachhawpte an sawi dun a; Mizoram aṭanga Ministry of Tourism-a scheme hrang hranga project thehluhte thlirho a ni. Inkawmnaah hian Ministry of Tourism additional secretary Suman Billa pawh a tel.

India ram chhung leh páwn aṭanga Mizoram tlawhtu pung zelah Mizoramin khualzin tam zawk hîp theihna a neihte tihpuitlin zel dan tur Lalnghinglova chuan a sawi a; khawtlang nen ṭangruala hmalakna, ‘community-based tourism’ leh tourism entrepreneur-te an pawimawh thu sawiin, Tourism Ministry scheme tharah component pakhat anga telh theih ni se tiin a rawt a ni.

Bhuvnesh Kumar chuan, Tourism Ministry kalphung a inthlak mek a, hmun tam taka project tereuhtê tê siam loin, state pakhatah project lian tham pahnih khat kalpui a, khawvel huapa lang tham thil siam tum a nih thu a sawi.

Excise & Narcotics minister Lalnghinglova Hmar hi Narcotics Control Bureau (NCB) director general Anurag Garg te nen a pisaah an inkâwm a, Mizorama ruihhlo donaa hmalakna kal mek leh hmachhawpte an sawi dun.

Lalnghinglova Hmar chuan, ruihhlo donaa END hmalaknain rah ṭha a chhuah mek tih sawiin, “Sorkar leh tlawmngai pawlte thawhho ṭhat zarah ruihhlo a váng tial tial a, heroin no. 4 man nasa takin a sâng tawh. Ruihhlo a la rêm lo a, a hma anga a tlâwm ta lo hi a vân vangah kan ngai,” a ti.

END Minister chuan, NCB aṭangin tun hnaiah ruihhlo donaa hman atan lirthei eng emaw zat Mizoramin a dawn thu sawiin, "Ṭangkai taka hman mek a ni. Mizoram hi Myanmar ramri depa awm, India rama ruihhlo rawn luhna kawngkapui pakhat a nih avangin ngaih pawimawh a ngai a, END-in sorkar laipuiah zawmpui ministry a neih loh avangin NCB nen thawhhona ṭha kan neih zel a ngai," a ti a; ruihhlo donaa hman tur lirthei Mizoramin a la mamawh belh thu a sawi.

Anurag Garg chuan, Minister thu thlente chu a hlawhtlin theih nan theihtawp an chhuah tur thu a sawi a; Aizawlah NCB Zonal Office din tum a ni a, sorkarin a pawmpui tawh thu sawiin, tihhlawhtlin a nih theih nan hma lakpui turin END Minister a ngen a ni.