PHE Minister leh Israel officer inkâwm

Public Health Engineering (PHE) minister Prof. Lalnilawma chu June 30, Thawhlehni khan New Delhi Mizoram House-ah Embassy of Israel, MASHAV - Israel’s Agency for International Development Cooperation-a senior water resources specialist Neeraj Gahlawat nen an inkâwm.

Inkawmnaah hian India leh Israel thawhhona MASHAV hnuaia Embassy of Israel leh Mizoram sorkar inkara water sector-a thawhho dan tur leh hmalak dan turte an sawi dun. Mizoram mipuiin tui thianghlim zawk an dawn theih dan tur te, tui hman hnu (waste water) tihthianghlim dan tur te, tuihna humhalh leh siam belh dan te, environment humhalhnaa thawhho dan turte an sawi a ni.

Prof. Lalnilawma chuan, Mizoram dinhmun hriat chian nan remchang hmasa berah MASHAV hotute chu Mizorama zina zir chiang turin a sáwm a; a taka thawhho theih dan kawng zawnga hmalak vat a ṭul thu a sawi.

Sorkar thuchhuah tarlan danin, Israel Embassy chuan Aizawla tui lâkna hmun, chhan hrang hrang vanga chhe mekte thlang chhuak turin a ti a; thlan chhuah a nih hnuah Israel thiamna leh hmanraw thar hmangin a hmunhma siamṭhat leh humhalh zui dan turte enfiah a ni ang.

A taka hna thawh theih dan tur (technical feasibility) leh sum awm dan (funding) azirin pilot project te, inzirtirna (capacity building) leh sum hnár zawnna (resource mobilisation) thlenga thawhho zui theih dan tur kawng zawn a ni dawn bawk.

Prof. Lalnilawma hi New Delhi Mizoram House additional resident commissioner Alexander V Chongthu leh PHE additional secretary V Lalengmawia ten an ṭawiawm a ni.