Chuap lam natna press mite hrilhfiah

Manipal Hospital - Broadway hotute chuan nimin khan Doctor’s Day pualin Aizawl Press Club-ah thuthar thehdarhtute an kâwm a; chuap natna, invên dan leh a enkawl dan chungchang sawifiahin, an damdawi-inah chuap lam natna enkawlna ṭha tak an neih thu an sawi.

Kolkata-a Manipal Hospital pathum - Broadway, EM Bypass leh Salt Lake-a Pulmonology HoD Dr Debraj Josh chuan, fûr laiin chuap natna a tam bik tih sawiin, "Chuap lam natna hi fûr laia tlanglawn a ni a, pneumonia, bronchitis leh fungal infection te a awm duh bik. Inven ṭhat a pawimawh rualin, chuap natna nei tan enkawlna ṭha a pawimawh zual," a ti.

Dr Debraj Jash chuan zawhna chhángin, Pulmonology (chuap leh áwm báwr vel) natna nei Mizoram aṭanga Manipal Hospital pantu zingah chuap cancer an tam ber thu a sawi.

Manipal Hospitals hotute chuan, chuap leh áwm lam natna enkawlna ṭha tak an nei tih sawiin, Mizote tan an inhawn reng thu an sawi a; an damdawi-inte chu Mizoram Universal Healthcare Scheme nen an inthlun zawm tih sawiin, MUHCS hnuaiah a thlâwnin an enkawl theih thu an sawi bawk.