Kum 16 chhungin eirûk thubuaiah mi 112 thiam loh chantir an ni

Chief minister Lalduhoma chuan nimin khan CM conference hall-ah ACB Annual Report 2025-26 a tlangzarh a; Report-ah hian, kum 16 chhungin eirûk thubuaiah mi 112 thiam loh chantir an ni tih tarlan a ni.

ACB Annual Report-a tarlan danin, kum 2010-2026 inkar, kum 16 chhungin Anti Corruption Bureau, Mizoram chuan eirûk thubuai (corruption case) 35-ah court-ah chargesheet an thehlut a; eirûknaa inhnamhnawih mi 112 chu Special Court (Prevention of Corruption Act)-in thiam loh a chantir.

Chief Minister chuan, "Eirûkna hi rorelna ṭha siamna dâltu leh ram hmasawnna tichhetu a ni a, eirûkna do hi agency pakhat mawhphurhna chauh ni loin, mipui leh sorkar hnathawk zawng zawngte mawhphurhna a ni. Hlemhlêtna do tura hmalakna chak tak neih a ṭul avangin sorkar chuan ACB leh Mizoram Lokayukta te a thuam chak a, thawktute pawh an intuaihriam kan beisei," a ti.

ACB-in Annual Report hmasa ber an buatsaih thei chu lawmawm a tih thu sawiin Lalduhoma chuan, "Report hian sorkar hnathawkte'n rinawm leh dik taka an mawhphurhna an hlen a pawimawhzia te, sum leh pai enkawlnaah dik taka thil tih a ṭulzia te min hrilh thar dawn a ni," a ti a; ACB Annual Report chuan hun kal zel turah awmzia a neih a beisei thu a sawi.