Eirawngbawlna gas man a pung

Indian Oil Corporation-in eirawngbawlna gas (LPG) man a tihchhuah thar zuiin Food, Civil Supplies & Consumer Affairs (FCSCA) department chuan Mizorama gas man a tichhuak. Domestic cylinder (kg 14.2) leh composite (kg 10) man tihsan a ni a, July 1, 2026 khan hman ṭan a ni.

FCSCA tarlan danin, chhungkuaa eirawngbawlna atana hman tlánglâwn domestic cylinder man chu Rs 29-a tihsan a ni. June 2026-ah Vairengteah bûr khat Rs 1,056 man a nih laiin, a man tharah chuan Rs 1,085 a ni a; Mizoram hmun dang zawngah Rs 1,094 (June-ah Rs 1,065) man a ni thung.

LPG domestic cylinder hi March 7, 2026-a sorkar laipuiin West Asia buaina vanga Rs 1,005 (Vairengteah Rs 996) aṭanga Rs 1,065 (Vairengteah Rs 1,056)-a a tihsan hnuah a la tlahniam leh lo.

Vairengte tih loh hmun dang zawngah commercial cylinder (kg. 19) man Rs 3,425.50 (June-ah Rs 3,598.50) niin, XtraTej (kg. 19) chu Rs 3,448 (June-ah Rs 3,621) a ni a; composite (kg. 10) man chu Rs 787 (June-ah Rs 766.50) a ni.

Mizoram luhka Vairengteah chuan commercial cylinder man Rs 3,411 (June-ah Rs 3,584), XtraTeJ man Rs 3,433.50 (June-ah Rs 3606.50) leh composite man Rs 777 (June-ah Rs 756.50) a ni thung.

Gas man pangngai bakah hian home delivery kalpuina hmunah chuan Rs 70 belh zel tur niin, point delivery kalpuinaah Rs 7.53 belh zel tur a ni a; kudama hralh a nih chuan Rs 33.43 paih tur a ni.