KHAWTHLIR

CT Scan hawng

Advisor to CM (Technical) H Ginzalala, Champhai North bialtu MLA chuan nimin khan Champhai District Hospital-a Doctors Lounge-ah CT Scan khawl thar a hawng. H Ginzalala chuan, CT Scan khawl bun a nih theihna tura thâ thawh zawng zawngte an hriat reng thu a sawi a, "Sorkar kal tawhte leh bialtu MLA lo ni tawhte hnathawh kan chhunzawm a, hman theiha peih a ni ta hi hmasawnna nasa tak a ni," a ti.

733 tih tur zawk tur

Information & Public Relations department chuan thuchhuah siamin, tun hnaia Aizawl District AIDS Prevention and Control Committee ṭhutkhawm chungchang an website-a an tarlanah, 'men having sex with men (MSM) thisen endik zat 7,333' tih chu 733 tih zawk tur a nih thu an tarlang a; "Typographical error-ah thupha kan chawi e," an ti.

Vawk lak luh khap

Hnahthial district magistrate K Vanlalruati chuan thupek chhuahin, AH&Vety department emaw, mahni khua ṭheuh village council/VFA/VLTF on ASF-te emaw phalna leh hriatpuina tel lo chuan Hnahthial district-ah mahni khua emaw, khaw dang aṭangin emaw vawk, vawksa leh vawksa aṭanga siam lak luh leh hralh khap a nih thu a puang.

Bawlhhlawh thliar

Lawngtlai District Solid Waste Management Rules 2026 Committee chuan nimin khan an chairman Donny Lalruatsanga, bawrhsap hoin an ṭhu a, dan thar hnuaia district leh khaw mala bawlhhlawh chi lia thliar tura hmalak dan tur an rêl. Bawlhhlawh chi lia thliar chu October thla thlengin khawpui chhunga vengah 30% leh khawpui pawn lama khuaah 15% tal tihhlawhtlin ni se, tiin an rel a ni.

Computer sem

Lunglei DC Navneet Mann chuan nimin khan DC conference hall-ah Rashtriya Gram Swaraj Abhiyan kaltlangin Lunglei district-a village council 21 hnenah computer leh printer a sem. Bawrhsap chuan, VC-te chu mipui rorelna bulṭhut an nih angin sorkarin an thâ tihchak nan ruahmanna hrang hrang a siam thu a sawi a; hmanrua an dawnte chu khawtlang tan ṭangkai taka hmang turin a chah.

VB-GRAMG sawiho

Aizawl bawrhsap Lalhriatpuia hoin nimin khan Aizawl DC Pisapui Hall-ah line department-te pualin ni 125 inhlawhna, Viksit Bharat - Guarantee for Rozgar and Ajeevika Mission-Gramin (VB-GRAMG) chungchang zirho a ni. Line department-te chu VB-GRAMG chungchang zir chiang a, an department aṭanga ruahmanna leh mamawhte July 2026 chhunga Aizawl DRDO Project Director hnenah thehlut tura tih an ni.

Hindi CM sawipui

Mizoram Hindi Board hruaitute chuan nimin khan chief minister Lalduhoma a pisaah an hmu a; Hindi zirlaite tan student hostel leh Hindi computer learning centre din tura an ngenna chu tihhlawhtlinsak a tum thu CM chuan a lo hrilh niin an tarlang. Hindi Board hruaitute hian Mizote'n tun aia nasa zawka Hindi an thiam theihna atana hmalakna dan tur te, Central fund tam zawk hnuh chhuah dan tur te, primary level-a Hindi zirna kalpui theih dan turte leh thil dangte an sawipui a ni.