Media-te information chhuahte mi zawng zawng huapzo a ni tur a ni - IPR Minister

Press Information Bureau (PIB) chuan nimin khan IPR Lianchhiari Rûn-ah Inter-Media Publicity Coordination Commitee (IMPCC) meeting an huaihawt a; Information & Public Relations, Printing & Stationery (IPRPS) minister B Lalchhanzova'n hmanpuiin, media-te'n information an tihchhuah chu mi zawng zawng huap zo tur a nih thu a sawi.

IPRPS Minister chuan, tunlaiah information a darh chak tawh êm avangin information dik lo laka invên nan thawhhona mumal tak neih a pawimawh thu a sawi a; sorkar policy leh scheme hrang hrang Mizo ṭawnga lehlina tihchhuah leh on platform-ah kut hnathawktute tilang tam tura media mite chahin, "Information chu mi zawng zawng huapzo a ni tur a ni," a ti.

Tunlaiah thuthang dik lo a darh chak tawh tih sawiin B Lalchhanzova chuan, "Media-te'n in thu chhuah reng reng website leh social media hrang hrangah rang tak leh thu dik tak chauh in pek chhuah ṭhin a pawimawh," a ti a; mipui rin ngam an nih zel thei nan theihtawp chhuah tura a fuih bakah, sapṭawnga thu chhuah ṭhin media-te chu Mizoram tourism ṭhan nasatzia tarlang tam turin a chah.

Doordarshan Kendra, Aizawl director (News) Nampibou Miranmai, IMPCC chairman pawhin thu sawiin, IMPCC chu media-te leh sorkar department hrang hrangte thawhhona pawimawh tak a nih thu a sawi.

IMPCC hi Ministry of Information & Broadcasting-in a din a ni a, state tina media-te nen thawkhoin, sorkar department hrang hrang hnathawhte mipui hnena puan chhuah kawngah hna a thawk ṭhin.

Nimina ṭhutkhawm hi kumina a vawi hnihna a ni a, Mizo ṭawng bakah English leh Hindi-a thu chhuah tam te, Mizo mipui hnenah GST chungchang hriattir tam te, ruih theih thil ṭhat lohna hawi zawng information pek chhuah tam chungchangte sawiho a ni.