Minister-in Champhai Winery a tlawh

Agriculture and Farmers Welfare minister PC Vanlalruata chuan nimin khan Champhai Winery a tlawh a, thawktute nen winery hmasawn zel dan tur leh sorkar hmachhawpte an sawiho.

PC Vanlalruata chuan, Champhai Winery-a thawkte'n harsatna an tawh an sawite chu a theih ang anga bawhzui a tum thu a sawi a, "Sorkarin kut hnathawktute hmakhua ngaiin Wine Rule a siam ṭha a, dan hnuaiah wine leh fruit beer te zawrh theih a ni tawh dawn," a ti.

Champhai Winery chu Mizorama winery lian ber pawl a nih thu sawiin Minister chuan, "Kut hnathawktute pawhin an chhawr ṭangkai a, hetianga an thlai thar chhuah aṭanga wine siam chhuah a ni hi Agriculture Minister ka nihna ang pawhin ka lawm hle. Thlai dang aṭang pawha siam chhuah zel theih ni se a duhawm," a ti a; grape ni lo thlai dang aṭanga wine siam chhuah theih dan sorkarin a ngaihtuah zel dawn thu a sawi.

Agriculture Minister chuan, tun hnaiah Ministry of Agriculture & Farmer Welfare hnuaia Market Intervention Scheme aṭangin Mizoram Agriculture Marketing Board-in sawhthing sawngbawlna atan Rs 9,48,14,281 leh Champhai Winery atan Rs 3,68,84,297 an dawn thu a sawi a, "Heng sum leh paite hi dik taka hman a nih chuan hmasawnna tluantling thlen thei a ni a, kut hnathawktute'n a zar an zo ngei theih nan sorkar hnathawk tute pawhin ngaihtuahna tak tak an sen chhoh ka beisei," a ti.