Chhùl hmáwr cancer venna pekah Lunglei district-ah target aia tam pe

Sorkar laipuiin hmeichhia kum 14 aṭanga kum 15 leh thla thum inkarte hnena chhùl hmáwr cancer venna damdawi - Human Papillomavirus (HPV) vaccine pek a kalpuiah Lunglei district-ah chuan vaccine pek tura ruahman aia tam pek a ni a; target 1,243 aṭangin tleirawl 1,326 (107%) hnenah vaccine pek a ni.

Sorkar thuchhuah tarlan danin, February 28 - May 31, 2026 chhungin India ram puma chhul hmawr cancer thlentu HPV laka invenna tur vaccine a thlawna pek rûnpui kalpui a ni a; Lunglei district-ah hmeichhe tleirawl kum 14 aṭanga kum 15 leh thla thum inkar target 1,243 awmin, tleirawl 1,326 (107%) hnenah HPV vaccine pek a ni.

HPV vaccine hman mek hi GARDASIL niin, HPV Strain pali - 6, 11, 16 leh 18-te laka venna a ni a, vawi khat chiu (single dose) zela pek a ni. Damdawi a thlawna pek a nih bakah hian, health & wellness centre leh a chung lam damdawi-inah a thlawnin chhul hmawr cancer endikna kalpui mek a ni bawk.

Lunglei district-a Health department hotute chuan, DC bakah, department leh pawl hrang hrang ṭawiawmna an dawn ṭhat thu leh village council-te'n an khuaa tleirawlte'n PHC-a vaccine an lak theih nan lirthei hman tur an ngaihtuahsak ṭhin thu an sawi.

HPV Vaccination Campaign-a target khûm a nih theih chhan chu Chief Medical Officer leh a thawhpui te, District Education Officer leh a thawhpui te, department hrang hrang, tlawmngai pawl leh khawtlang hruaitute thawhhona vang a nih thu an sawi bawk.